Rusiyada kolorektal xərçəngin müalicəsi üçün nəzərdə tutulan “Onkorna” mRNT vaksininin 2027-ci ildən icbari tibbi sığorta proqramına daxil edilməsi planlaşdırılır.

Aztibb.az "Life" portalına istinadən yazır ki, bu barədə Rusiya İcbari Tibbi Sığorta Federal Fondunun sədr müavini Olqa Tsaryova Federasiya Şurasının sosial siyasət komitəsinin iclasında məlumat verib.

“Gələn il fərdiləşdirilmiş müalicə üsullarının əhatəsini digər vaksinlər, o cümlədən Federal Tibbi-Bioloji Agentliyinin (FMBA) mütəxəssisləri tərəfindən hazırlanmış ‘Onkorna’ və digər preparatlar hesabına genişləndirməyi planlaşdırırıq”, – deyə fondun nümayəndəsi bildirib.

Nəzərdə tutulur ki, bu müalicə ilə bağlı xərclər icbari tibbi sığorta sistemi tərəfindən qarşılanacaq, müalicə isə federal tibb müəssisələrində aparılacaq. Tsaryova vurğulayıb ki, müvafiq tibbi göstərişlər olduğu halda, Rusiya vətəndaşlarının hamısı bu tibbi yardımdan yararlanmaq imkanına malik olmalıdır.

“Onkorna” pasiyentin şişinin xüsusiyyətləri nəzərə alınmaqla fərdi qaydada hazırlanan mRNT vaksindir. Preparat xəstəliyin profilaktikası üçün deyil, artıq diaqnoz qoyulmuş xərçəngin müalicəsi məqsədilə nəzərdə tutulub.

Federal Tibbi-Bioloji Agentlik bu preparatın klinik tətbiqinə 2026-cı ilin aprelində icazə alıb. Vaksin ən azı iki mərhələ şişəleyhinə müalicə almış, metastatik kolorektal xərçəngi olan yetkin pasiyentlər üçün nəzərdə tutulub.

Bundan əlavə, preparat mikrosatellit qeyri-sabitliyi (MSI-H) olan şişlərdə immun nəzarət nöqtələrinə təsir göstərən dərmanlarla birlikdə istifadə oluna bilər. Preparatın təyin edilməsi barədə qərarı xəstəliyin xüsusiyyətlərini nəzərə alaraq həkim verir.