Onkoloji xəstəliklərin insandan insana keçməsi ilə bağlı fikirlər səslənsə də, söhbət xərçəng hüceyrələrinin ötürülməsindən deyil, bəzi virus infeksiyalarının xərçəngin yaranma riskini artırmasından gedir.

Aztibb.az "Pravda" nəşrinə istinadən yazır ki, bu barədə Seçenov Universitetinin Fərdiləşdirilmiş Onkologiya İnstitutunun direktoru, professor Marina Sekaçova bildirib.

Mütəxəssisin sözlərinə görə, insan papilloma virusu (HPV) uşaqlıq boynu xərçənginin əsas risk faktorlarından biridir. HPV infeksiyasının qarşısının alınması bu xərçəng növünün yaranma ehtimalını əhəmiyyətli dərəcədə azalda bilər. Ən effektiv profilaktik tədbirlərdən biri isə virusa yoluxmadan əvvəl aparılan vaksinasiyadır.

Digər mühüm nümunə hepatit B virusudur. Uzunmüddətli infeksiya qaraciyərdə xroniki iltihaba səbəb olaraq qaraciyər xərçəngi riskini artıra bilər. Hepatit B-yə qarşı vaksinasiya artıq profilaktik peyvənd təqviminə daxildir.

Həkimlər vurğulayırlar ki, “yoluxucu xərçəng” ifadəsi elmi baxımdan düzgün deyil. Yoluxa bilən xərçəngin özü deyil, onun yaranma riskini artıran virus infeksiyasıdır. Buna görə vaxtında vaksinasiya və virus infeksiyalarına nəzarət xərçəngin profilaktikasında mühüm rol oynayır.