Lerik Rayon Mərkəzi Xəstəxanasında “Tibb işçisinin peşəkar davranış qaydaları” mövzusunda təlim keçirilib.

 

Xəstəxanadan Aztibb.az-a bildirilib ki, Lerik RMX-nın baş tibb bacısı E. Babayeva və müəssisədaxili təlimlərin təşkili üzrə koordinatoru A. Hüseynov tərəfindən keçirilən təlimdə əməkdaşların peşəkar inkişafının və iş fəaliyyətində etik prinsiplərə riayət olunmasının dəstəklənməsi məqsədilə pasiyentlərlə davranış deontologiyası mövzusunda maarifləndirici təlim keçirilib.

 

Təlim zamanı tibb işçilərinin pasiyentlərlə düzgün və etik ünsiyyəti, pasiyent hüquqlarına hörmət, tibbi məlumatların məxfiliyinin qorunması, peşəkar davranış prinsipləri və komanda daxilində effektiv kommunikasiya kimi mühüm məsələlər müzakirə olunub.

 

İnteraktiv formatda təşkil olunan görüşdə real iş situasiyaları ətrafında fikir mübadiləsi aparılıb, iştirakçıların sualları cavablandırılıb və müxtəlif yanaşmalar müzakirə edilib.

 

Təlimin əsas məqsədi tibb işçilərində peşə etikası, məsuliyyətli davranış və pasiyent yönümlü yanaşma prinsiplərinin daha da möhkəmləndirilməsinə töhfə vermək olub.