İsrailli alimlərin araşdırmasına görə, insan beyni böyük ölçülü görüntüləri kiçik görüntülərlə müqayisədə daha yaxşı yadda saxlayır. Bu nəticə görüntünün keyfiyyətindən və tərkibindəki məlumatın miqdarından asılı olmayıb.

Aztibb.az xəbər verir ki, Bar-İlan Universitetinin alimləri 18-40 yaş arasında 182 nəfərin iştirakı ilə yeddi eksperiment keçiriblər. İştirakçılara müxtəlif şəkillər yalnız bir dəfə göstərilib və onların yaddaş reaksiyaları araşdırılıb.

Nəticələr göstərib ki, böyük görüntülər kiçik görüntülərdən təxminən 1,5 dəfə daha yaxşı yadda qalıb. Maraqlıdır ki, böyük, lakin bulanıq şəkillər də kiçik və daha aydın görüntülərdən üstün olub.

Alimlər hesab edir ki, görüntünün ölçüsü beynin vizual emal üçün ayırdığı resurslara təsir göstərə bilər. Bu səbəbdən böyük ekranlarda nümayiş etdirilən videoların da kiçik ekranlarla müqayisədə daha yaxşı yadda qalması mümkündür.

Tədqiqat müəllifləri bildirirlər ki, nəticələr elektron təhsil üçün də əhəmiyyət daşıyır. Xüsusilə dərs materiallarının smartfon kimi kiçik ekranlarda öyrənilməsi böyük ekranla müqayisədə daha az effektiv ola bilər.