Kino, muzey və teatr kimi mədəni tədbirlərdə müntəzəm iştirak edən insanların fizioloji yaşının daha aşağı ola biləcəyi müəyyən edilib.

Aztibb.az xəbər verir ki, Tokio Elm İnstitutunun alimləri 50 yaşdan yuxarı 1899 şəxsin məlumatlarını təhlil edərək mədəni fəallıq ilə bioloji yaş arasında əlaqə aşkarlayıblar.

Tədqiqatda iştirakçıların qan təzyiqi, əl sıxma gücü, yerimə sürəti və xolesterin səviyyəsi də daxil olmaqla 10 fizioloji göstəricisi qiymətləndirilib. Nəticələrə əsasən, mədəni tədbirlərdə daha aktiv iştirak edən şəxslərin fizioloji yaşı xronoloji yaşlarından orta hesabla üç il aşağı olub.

Mədəni fəallıq göstəricisinin bir bal artması fizioloji yaşın orta hesabla 31 gün daha aşağı olması ilə əlaqələndirilib. Bu əlaqə gəlir, məşğulluq və xroniki xəstəliklər kimi amillər nəzərə alındıqdan sonra da müşahidə olunub.

Alimlər mədəni tədbirlərdə iştirakın sosial əlaqələri gücləndirməsi, psixi sağlamlığa müsbət təsir göstərməsi və sağlam həyat tərzini təşviq etməsi ilə qocalma prosesinə təsir edə biləcəyini düşünürlər.

Bununla belə, araşdırma müşahidə xarakterlidir və mədəni fəallığın birbaşa olaraq qocalmanı ləngitdiyini sübut etmir. Sağlamlıq vəziyyəti daha yaxşı olan insanların mədəni tədbirlərdə iştirak etmək imkanlarının daha çox olması da mümkündür. Nəticələri təsdiqləmək üçün əlavə tədqiqatlara ehtiyac var.