Alzheimer xəstəliyinin müalicəsində robotik mikrocərrahiyyənin mümkün effektivliyi araşdırılır. ABŞ Qida və Dərman Administrasiyası (FDA) bu istiqamətdə aparılan erkən mərhələli klinik tədqiqata daha çox pasiyentin cəlb edilməsinə icazə verib.

Aztibb.az xəbər verir ki, REMIND adlı tədqiqatda MMI şirkətinin Symani robotik sistemi vasitəsilə boyundakı dərin limfa düyünlərində drenaj yollarının mikrocərrahi üsulla bərpasının təhlükəsizliyi və mümkün faydası qiymətləndirilir.

İlkin mərhələdə beş nəfərədək pasiyentin cəlb edilməsi nəzərdə tutulsa da, FDA-nın qərarından sonra iştirakçıların sayının 15 nəfərə qədər artırılmasına icazə verilib. Tədqiqata yüngül və orta dərəcəli Alzheimer xəstəliyi və limfa sistemində təsdiqlənmiş pozğunluqları olan şəxslər daxil edilir.

Tədqiqatın əsas məqsədi beynin zərərli maddələrdən, o cümlədən amiloid beta və fosforlaşmış tau zülallarından təmizlənməsində rol oynadığı düşünülən limfa drenaj yollarının bərpasının xəstəliyin gedişinə təsirini araşdırmaqdır.

İlkin iştirakçılarda 30 günlük təhlükəsizlik məlumatlarının qiymətləndirilməsindən sonra tədqiqatın genişləndirilməsinə qərar verilib. Daha geniş əsas klinik sınağın keçirilməsi də nəzərdən keçirilir.

Symani robotik sistemi cərrahın əl hərəkətlərini daha kiçik və dəqiq robotik hərəkətlərə çevirir, titrəmələri azaldır və diametri bir millimetrdən də kiçik damar və limfa strukturları üzərində mikrocərrahiyyə aparmağa imkan verir.

Mütəxəssislər qeyd edirlər ki, yanaşma hələ tədqiqat mərhələsindədir və onun Alzheimer xəstəliyinin inkişafına təsir göstərib-göstərmədiyini müəyyənləşdirmək üçün daha geniş klinik araşdırmalara ehtiyac var.