Süni intellekt əsaslı texnologiyalar tibb bacılarının sənədləşmə işinə sərf etdiyi vaxtı azaltmaqla onların xəstələrə daha çox diqqət ayırmasına imkan yarada bilər.

Aztibb.az xəbər verir ki, ABŞ-də bəzi xəstəxanalarda tətbiq edilən “ambient AI” texnologiyaları tibb bacılarının real vaxtda səsləndirdiyi klinik qeydləri avtomatik sənədləşdirir. Hazırlanan məlumatlar daha sonra tibb bacısı tərəfindən yoxlanılır və təsdiqlənir.

Advocate Health sistemində bu texnologiyadan istifadə edən tibb bacılarının 80 faizdən çoxu əhəmiyyətli vaxt qənaəti əldə etdiyini bildirib. İstifadəçilərin 65 faizi isə sistemi hər növbədə ən azı altı dəfə aktivləşdirir. Sənədləşdirmə üçün iş saatlarından sonra sərf olunan vaxtın da azaldığı qeyd olunur.

Mütəxəssislər vurğulayırlar ki, süni intellekt klinik qərarları əvəz etməməli, yalnız məlumatların toplanması və sistemləşdirilməsinə kömək etməlidir. AI tərəfindən hazırlanan bütün qeydlər xəstəyə qulluq edən tibb bacısı tərəfindən nəzərdən keçirilməli və təsdiqlənməlidir.

ABŞ-də tibb bacısı çatışmazlığı və peşədən ayrılmalar fonunda sənədləşmə yükünün azaldılması mühüm məsələ hesab olunur. Ekspertlər süni intellektin effektiv tətbiqi üçün tibb bacılarının texnologiyanın hazırlanması və iş prosesinə inteqrasiyasında birbaşa iştirakının vacibliyini bildirirlər.

Onların fikrincə, texnologiyanın uğuru yalnız istifadənin həcmi ilə deyil, tibb bacısına real vaxt qazandırması və xəstə ilə ünsiyyəti artırması ilə qiymətləndirilməlidir.