ABŞ Qida və Dərman Administrasiyası (FDA) 50 yaş və yuxarı şəxslər üçün mRNT texnologiyası əsasında hazırlanmış üçvalentli qrip vaksininə təsdiq verib.

Aztibb.az xəbər verir ki, mRNA-1010 (mFLUSIVA) vaksini qripə qarşı mRNT texnologiyasından istifadə edən ilk təsdiqlənmiş vaksin olub. Vaksin 50-64 yaş qrupunda ənənəvi, 65 yaş və yuxarı şəxslərdə isə sürətləndirilmiş təsdiq alıb.

III faza klinik tədqiqatında vaksin standart dozalı qrip vaksinləri ilə müqayisədə daha yüksək effektivlik göstərib. 50 yaş və yuxarı iştirakçılar arasında nisbi vaksin effektivliyi 26,6 faiz, 65 yaş və yuxarı şəxslərdə isə 27,4 faiz təşkil edib.

Vaksin influenza A/H1N1, A/H3N2 və B/Victoria ştammlarını hədəfləyir. Əksər əlavə təsirlər yüngül və orta dərəcəli olub, ciddi əlavə təsirlərin tezliyi mRNA-1010 qrupunda 2,2 faiz, standart vaksin qrupunda isə 1,9 faiz təşkil edib.

Mütəxəssislər təsdiqin mRNT texnologiyasının qrip kimi digər infeksion xəstəliklərə qarşı vaksinlərin hazırlanmasında potensialını göstərdiyini bildirirlər. Preparatın ABŞ-də 2026-2027-ci illərin qrip mövsümündə istifadəyə verilməsi gözlənilir.