Mədəaltı vəzi xərçənginin yüksək risk qrupunda olan şəxslərdə KRAS mutasiyalarını hədəfləyən peptid vaksin ilkin mərhələdə ümidverici nəticələr göstərib.

Aztibb.az xəbər verir ki, Johns Hopkins Medicine alimlərinin apardığı kiçik tədqiqatda vaksinin mədəaltı vəzinin axacaqlı adenokarsinoması (PDAC) ilə əlaqəli KRAS mutasiyalarına qarşı immun cavab yaratdığı müəyyən edilib.

Tədqiqata irsi olaraq mədəaltı vəzi xərçəngi riski yüksək olan 20 nəfər daxil edilib. Beş dozada tətbiq olunan mKRAS-VAX vaksini 18 pasiyentdə KRAS-a spesifik T-hüceyrə cavabı yaradıb. İmmun cavab bəzi pasiyentlərdə iki ilədək davam edib.

16,5 aylıq müşahidə müddətində iştirakçıların heç birində mədəaltı vəzi xərçəngi inkişaf etməyib. Ağır, 3-cü və daha yüksək dərəcəli yan təsirlər qeydə alınmayıb. Ən çox rast gəlinən yan təsirlər yorğunluq, üşütmə və qripəbənzər əlamətlər olub və öz-özünə aradan qalxıb.

Tədqiqatçılar həmçinin bəzi pasiyentlərdə mədəaltı vəzi kistalarının gerilədiyini müşahidə ediblər. Bununla belə, nəticələrin kiçik iştirakçı qrupu üzərində əldə edildiyi və vaksinin xərçəngin qarşısını alma effektivliyini müəyyənləşdirmək üçün daha geniş klinik tədqiqatlara ehtiyac olduğu vurğulanır.

Alimlər mKRAS-VAX-ın mədəaltı vəzi xərçəngi riski yüksək olan şəxslərdə xəstəliyin inkişafının qarşısının alınması üçün potensial immunprofilaktik yanaşma ola biləcəyini bildirirlər.