Qaraciyər orqanizmdə maddələr mübadiləsi, toksinlərin zərərsizləşdirilməsi və immun sisteminin fəaliyyətində mühüm rol oynayır.
Aztibb.az xəbər verir ki, qaraciyərin iltihablanması hepatit adlanır və uşaqlarda bu vəziyyət müxtəlif səbəblərdən yarana bilər.

Uşaqlarda hepatit kəskin və ya xroniki formada inkişaf edə bilər. Xəstəliyin yaranmasına bir sıra amillər səbəb olur.

Əsas səbəblər:

Virus infeksiyaları;
Autoimmun xəstəliklər;
Bəzi dərmanlar və toksik maddələrin təsiri;
Metabolik və irsi xəstəliklər;
Qaraciyərin piylənməsi ilə əlaqəli iltihabi proseslər.

Hansı əlamətlərə diqqət etmək lazımdır?

Hepatit zamanı uşaqlarda halsızlıq, iştahasızlıq, ürəkbulanma, qarın ağrısı və qusma kimi əlamətlər müşahidə oluna bilər. Bundan əlavə, sidiyin tündləşməsi, nəcisin rənginin açılması, dərinin və gözlərin saralması da qaraciyər iltihabının mümkün əlamətləri sırasında yer alır.

Bəzi hallarda isə hepatit heç bir nəzərəçarpan əlamət olmadan inkişaf edə bilər. Bu səbəbdən xəstəliyin erkən aşkarlanması və düzgün diaqnostika mühüm əhəmiyyət daşıyır.

Erkən diaqnostika qaraciyər zədələnməsinin səbəbinin müəyyənləşdirilməsinə və vaxtında müalicəyə başlanılmasına imkan verir.

Uşaqda qaraciyərlə bağlı şübhəli əlamətlər müşahidə olunarsa, pediatr və ya hepatoloqa müraciət etmək tövsiyə olunur.