Qamaleya adına Milli Epidemiologiya və Mikrobiologiya Tədqiqat Mərkəzi bildirib ki, legionellyoz halları nadir aşkarlansa da, bu, xəstəliyin olmaması ilə deyil, diaqnostikasının zəif aparılması ilə bağlıdır. İsveçrənin Bazel şəhərində legionellyoz xəstəliyinin yayılması bu infeksiyanın Avropada geniş epidemiyaya çevriləcəyi və turistlər vasitəsilə digər ölkələrə də gətiriləcəyi anlamına gəlmir.

Aztibb.az "Life" portalına istinadən yazır ki, infeksionist, tibb elmləri doktoru, Qamaleya adına Milli Epidemiologiya və Mikrobiologiya Tədqiqat Mərkəzinin aparıcı elmi işçisi Vladimir Beloborodov bu barədə müsahibəsində məlumat verib.

Onun sözlərinə görə, legionellyozun ayrı-ayrı halları və lokal alovlanmaları müxtəlif ölkələrdə baş verə bilər. Lakin infeksiya demək olar ki, insandan insana keçmir. Buna görə də qrip və ya COVID-19 kimi genişmiqyaslı epidemiyanın yaranması ehtimalı çox aşağıdır.

"Legionellyoz bütün dünyada mövcuddur. Sadəcə, bu xəstəlik kifayət qədər yaxşı diaqnostika olunmur. Xəstəlik bağırsaq infeksiyası əlamətləri ilə müşayiət olunan pnevmoniya şəklində keçə bilər. Klinik baxımdan onu digər mənşəli pnevmoniyalardan ayırmaq olduqca çətindir. Legionella antigenini müəyyən edən standart sidik testi mövcuddur. 

Mütəxəssis qeyd edib ki, legionellyoz Legionella bakteriyaları tərəfindən törədilir. Bu bakteriyalar isti və durğun suda sürətlə çoxala bilir. Təhlükə yoluxmuş suyun xırda aerozol damcılarına çevrilərək tənəffüs yollarına daxil olması zamanı yaranır.

İnfeksiya mənbələri arasında duş sistemləri, cakuzi vannaları, fəvvarələr, hava nəmləndiriciləri və su ilə soyutma sistemi işləyən sənaye soyuducu qüllələri (gradirnalar) yer alır.

Ekspert vurğulayıb ki, adi məişət kondisionerləri legionellaların tipik mənbəyi hesab edilmir. Risk əsasən daxilində su olan, bakteriyaların çoxalması üçün uyğun temperatur və şərait yaradan avadanlıqlarla əlaqədardır.