Toronto Universitetinin tədqiqatçıları müəyyən ediblər ki, uşaqlıqda valideynlərinin boşanmasını yaşamış insanlar həyatları boyunca depressiyaya tutulmağa digərlərinə nisbətən 41% daha çox meyllidirlər. Lakin valideynlərdə psixi xəstəliklərin və psixoaktiv maddə asılılığının təsiri nəzərə alındıqda, boşanma ilə depressiya arasındakı əlaqə xeyli zəifləyir.

Aztibb.az "planet today" nəşrinə istinadən yazır ki, psixoloqlar ABŞ-da yaşayan 128 mindən çox yetkin şəxsin məlumatlarını təhlil ediblər. Onların dörddə biri 18 yaşına çatmamış valideynlərinin boşanmasını yaşayıb. Bu qrupda depressiya halları 19,2% təşkil etdiyi halda, valideynləri birlikdə qalan şəxslərdə bu göstərici 14,1% olub. Ancaq valideynlərin psixi xəstəlikləri və psixoaktiv maddə asılılığı nəzərə alındıqda, boşanma ilə depressiya arasındakı statistik əlaqə əhəmiyyətini itirib.

Boşanma özü uşaqlar üçün stresli hadisədir. Lakin araşdırma göstərib ki, əsas risk təkcə boşanmanın özü deyil, onu müşayiət edən ailədaxili problemlərdir. Xüsusilə valideynlərin psixi pozuntuları və psixoaktiv maddələrdən istifadə etməsi uşaqların psixi sağlamlığına daha ciddi mənfi təsir göstərir.

Boşanmış ailələrdən olan iştirakçıların 20%-dən çoxu valideynlərində psixi pozuntu olduğunu bildirib. Valideynləri ailəni qoruyub saxlayan şəxslərdə isə bu göstərici 10%-dən az olub. Psixoaktiv maddə asılılığı isə boşanmış ailələrdə 35%, digər ailələrdə isə 15% təşkil edib. Tədqiqat müəlliflərinin fikrincə, məhz bu amillər ailədaxili gərginliyi artıraraq uşaqların psixi sağlamlığına mənfi təsir göstərir.

Oxşar nəticələr valideynləri heç vaxt rəsmi nikahda olmayan şəxslər arasında da müşahidə edilib. Buna görə də alimlər vurğulayırlar ki, psixi pozuntuları və ya asılılığı olan valideynlərə vaxtında psixoloji və tibbi dəstəyin göstərilməsi həm onların, həm də uşaqlarının sağlamlığı üçün böyük əhəmiyyət daşıyır.