Bu gündən etibarən rezidenturaya qəbul üzrə I mərhələdə müsabiqə şərtlərini ödəyən və II mərhələdə iştirak etmək hüququ qazanan namizədlərin qeydiyyat prosesinə start verilib.

Aztibb.az xəbər verir ki, bu barədə Dövlət İmtahan Mərkəzindən (DİM) məlumat verilib.

Məlumatda bildirilib ki, ötən illərdə rezidenturaya qəbulun I mərhələsində (baza fənləri üzrə biliklərin qiymətləndirilməsi imtahanında) "məqbul" nəticə göstərmiş namizədlər də II mərhələdə (ixtisas fənləri üzrə biliklərin qiymətləndirilməsi imtahanında) iştirak etmək üçün "Namizədin elektron ərizəsi" formasını dolduraraq müvafiq bənddə qeydiyyat aparmalı və ərizələrini təsdiq etməlidirlər (və ya etdirməlidirlər).

İxtisas fənləri üzrə biliklərin qiymətləndirilməsi imtahanına buraxılan namizədlər tələb olunan məbləği "Şəxsi kabinet" hesablarına daxil edib, Mərkəz tərəfindən müəyyən edilmiş müddətdə (22–30 iyul 2026-cı il tarixlərində) qeydiyyatdan keçməlidirlər.

İmtahanda sualların cavablandırılması üçün namizədlərə 2 saat 30 dəqiqə vaxt ayrılır. Xatırladaq ki, ixtisas fənləri üzrə imtahana yalnız baza fənləri üzrə imtahandan "məqbul" qiymət alan (40 və ya daha yüksək bal toplayan) namizədlər buraxılır.

Qeyd edək ki, rezidenturaya qəbul imtahanının birinci mərhələsinin nəticələri iyunun 22-də elan olunmuşdu.