Professor Ali Zırh: Yeni texnologiya ilə Parkinson xəstələrinin həyat keyfiyyətini cərrahiyyəsiz yaxşılaşdırmaq mümkündür
Parkinson xəstəliyi və digər hərəkət pozğunluqları olan insanlar üçün yeni nəsil, əməliyyatsız müalicə üsulları ümidverici nəticələr göstərir. Türiyədə Medipol Sağlık Grubunun beyin və sinir cərrahı professor Ali Zırh bildirib ki, “Ağıllı səs ötəsi müalicə” kimi tanınan "MR Guided Focused Ultrasound" (MRgFUS) texnologiyası sayəsində Parkinson xəstələrinin əl titrəmələrini əməliyyat aparmadan azaltmaq mümkündür.
Aztibb.az "A Haber"ə istinadən yazır ki, professorun sözlərinə görə, inkişaf edən texnologiyalar Parkinson və digər hərəkət pozğunluqlarının müalicəsində yeni mərhələnin əsasını qoyur. Medipol Acıbadem Bölge Hastanesində tətbiq edilən MRgFUS üsulu kəsik aparılmadan və xəstəxanada yatış tələb olunmadan həyata keçirilir.
Professor Zırh qeyd edib ki, bu metod vasitəsilə beyində titrəmələrə səbəb olan sinir fəaliyyətini dəyişdirmək və tənzimləmək mümkündür. Əvvəllər bu məqsədlə əsasən “beyin pili” adlanan dərin beyin stimulyasiyası tətbiq olunurdusa, yeni texnologiya cərrahi müdaxilə tələb etməyən alternativ kimi çıxış edir.
Kəllə sümüyü açılmadan müalicə
MRgFUS proseduru zamanı yüksək intensivlikli fokuslanmış ultrasəs dalğaları baş dərisi üzərindən keçərək beyində titrəməyə səbəb olan hədəf nahiyəyə yönəldilir. Ultrasəs enerjisi tədricən artırılır və simptomların yaxşılaşdığı nöqtədə həmin sahədə çox kiçik, dəqiq idarə olunan zədələnmə yaradılır.
Ali Zırhın sözlərinə görə, bütün proses maqnit-rezonans tomoqrafiyası (MRT) cihazının daxilində aparılır. MRT real vaxt rejimində beynin görüntülənməsinə imkan verdiyindən hədəf bölgə dəqiq müəyyən edilir və ultrasəs dalğalarının yaratdığı istilik nəzarətdə saxlanılır.
Bu üsul nəticəsində Parkinson xəstələrində müşahidə olunan titrəmə, əzələ sərtliyi və hərəkətlərin ləngiməsi əhəmiyyətli dərəcədə azala bilir.
Beş illik nəticələr ümidvericidir
Professor bildirib ki, xəstəxanada qalma tələb etməyən bu müalicə metodunun beşillik müşahidə nəticələrində xəstələrin təxminən 70–73 faizində əl titrəmələrinin nəzərəçarpacaq və davamlı şəkildə azaldığı müəyyən olunub.
Mütəxəssisin fikrincə, MRgFUS texnologiyası yalnız Parkinson xəstəliyində deyil, həmçinin Essential Tremor, bəzi psixiatrik pozğunluqlar və xroniki ağrı sindromlarının müalicəsində də istifadə oluna bilər.
Dünyada az sayda mərkəzdə tətbiq edilir
Ali Zırh vurğulayıb ki, bu texnologiya hazırda dünyada məhdud sayda tibb mərkəzində mövcuddur. Onun sözlərinə görə, Medipol Acıbadem Bölge Hastanesi beynəlxalq akkreditasiyadan keçmiş və bu üsulu bir ildən artıqdır uğurla tətbiq edən mərkəzlərdən biridir.
Professor Parkinson və digər hərəkət pozğunluqlarından əziyyət çəkən xəstələrə müraciət edərək bildirib: “Dərman müalicəsinin yetərli olmadığı və ya dərmanların yan təsirləri səbəbindən istənilən nəticənin əldə olunmadığı hallarda xəstələr ümidsiz olmamalıdırlar. Beyin pili müalicəsi ilə yanaşı, bu yeni texnologiya da onlara yenidən daha keyfiyyətli həyata qayıtmaq imkanı verə bilər.”
