Ümumdünya Səhiyyə Təşkilatının (ÜST) baş direktoru Tedros Adhanom Qebreyesus İsrail ordusunun Qəzza şəhərində basqın etdiyi, sonra isə tamamilə dağıdıb tərk etdiyi Şifa xəstəxanasındakı vəziyyətə reaksiya verib.

Bu barədə Aztibb.az medimagazin.com.tr-yə istinadla xəbər verir.

İsrailin mühasirəsindən sonra xaraba vəziyyətdə olan xəstəxananın fotosunu sosial şəbəkədə paylaşan T.Qebreyesus bildirib: "Bir daha deyirəm. Xəstəxanalara hörmət edilməli və qorunmalıdır. Xəstəxanalar döyüş meydanı kimi istifadə edilməməlidir".

Qeyd edək ki, İsrail ordusu martın 18-də səhər saatlarında Qəzza şəhərinin qərbində yerləşən və 7 mindən çox xəstə və məcburi köçkün fələstinlinin sığındığı Şifa xəstəxanasına basqın edərək, məcburi köçkün fələstinlilərin sığındığı kompleksi mühasirəyə alıb.

Qəzza hökuməti İsrail qüvvələrinin Şifa xəstəxanası və ətraflarında 400-dən çox fələstinlini öldürdüyünü, 900-dən çoxunu həbs etdiyini və 1050 evi dağıtdığını açıqlayıb.