Bronxit - ağciyərlərə hava daşıyan bronx şaxələrinin iltihablaşmasıdır. Kəskin və xroniki olmaqla iki yerə ayrılır. Xəstəliyin törədiciləri - viruslar, bakteriyalar (bəzən eyni vaxtda hər ikisi), göbələk, toksik, allergik və s. olur.

Aztibb.az xəbər verir ki, bu barədə Bakı Baş Səhiyyə Mərkəzinin strukturuna daxil olan 5 nömrəli Uşaq Poliklinikasının həkim-pediatrı Məhsəti Nəcəfova məlumat verib. Onun sözlərinə görə, xəstəlik 1 yaşa qədər körpələrdə çox vaxt bronxiolit şəklində rast gəlinir-ən kiçik bronx şaxələrinin iltihablaşması. Kəskin bronxitin simptomları kimi tutma şəkilli öskürək, döş qəfəsində ağrı, tənəffüs zamanı xırıltıların olması, baş ağrıları və s. göstərmək olar. Xroniki bronxit uzun sürən gedişlə, əsasən, kəskinləşmə və remisiyaların bir-birini əvəz etməsi ilə xarakterizə olunur. Bu zaman uşaqlarda bronx divarının selikli qişasında daimi ödəm müşahidə olunur ki, bu da təngnəfəslik və nəfəs darlığı əlamətləri ilə özünü büruzə verir.

Həkim-pediatr qeyd edib ki, obstruktiv bronxit daha təhlükəlidir. Bu da daimi tənəffüs pozulması ilə xarakterizə olunur. Virus formasında tənəffüs yoluna qrip, paraqrip, adenovirus, enterovirus, respirator sinsitial virus, rinovirus və s. daxil olur və xəstəliyin kliniki forması üzə çıxır. Bakterial forma pnevmokokk, stafilokokk, streptokokk, mikoplazma, xlamidiya və s., bəzən göbələk infeksiyası kandida albıcans tərəfindən törədilir. Yoluxma, əsasən, hava-damcı, kontakt-məişət yolu ilə baş verir. Xəstə uşağın qabları, oynatdığı oyuncaqlarla təmasda olduqda sağlam uşaq da yoluxa bilər.

 

M.Nəcəfova bildirib ki, xəstəliyin diaqnostikası qanın ümumi analizi, bəlğəmin müayinəsi, döş qəfəsinin rentgen müayinəsi, spiroqrafiya, KT, MRT, bronxoskopiya və s. həyata keçirilir:

“Xəstəliyin müalicəsinə gəldikdə isə, mütləq həkim - mütəxəssis tərəfindən müayinə olunmalıdır. Özbaşına müalicələr xəstəliyin xronikləşməsinə və ya digər ağırlaşmalara səbəb ola bilər. Otağın nisbi rütubətinə nəzarət etmək, xəstəliyin törədicisinə uyğun müalicə seçmək, fizioterapiya, inqalyasiyalar, UYT, elektrofarez və s. tətbiq olunur. Profilaktik tədbirlər kimi təmiz havada çox olmaq, düzgün qidalanma, xəstə uşaqlarla təmasdan çəkinmək tövsiyə olunur”.

 

O, bronxitin pnevmoniya, bronxial astma, göyöskürək, kistik fibroz kimi xəstəliklərlə bənzərlik təşkil etdiyini, dəqiq diaqnozun qoyulması üçün ilkin səhiyyə xidməti müəssisələrində fəaliyyət göstərən həkim-mütəxəssislərə müraciət etməyin zəruriliyini vurğulayıb.