Aztibb.az xəbər verir ki, bu fikirləri Bakı Baş Səhiyyə Mərkəzinin 1 nömrəli Dəri-Zöhrəvi Dispanserinin baş həkimi Yusif Cabbarlı qoturluq xəstəliyi ilə bağlı məlumat verərkən deyib.

 

Onun sözlərinə görə, qoturluq xəstəliyi bugünkü gündə ən geniş yayılmış, aktual xəstəliklərdən biridir. Əvvəlki illərlə müqayisədə xəstəliyin statistikasında artım müşahidə olunur. Qoturluq – infeksion-parazitar xəstəlikdir, canlılar - qotur gənələri tərəfindən yaradılır. İnkubasiya dövrü 8-14 gündən ibarətdir. Xəstəliyin əlamətləri kimi ən çox gecə qaşınmaları, dəridə qoşa səpkilər formasında özünü göstərir. Səpkilərə ən çox bədənin nazik yerlərində, qarın, dirsəyin ön hissəsində, sarğı nahiyələrində, cinsiyyət orqanlarında rast gəlinir.

 

Y.Cabbarlı bildirib ki, qoturluq yoluxucu xəstəlik olduğu üçün bir nəfərdə aşkarlanarsa, dərhal onun ailə üzvləri, təmasda olduğu digər şəxslər də müayinə və müalicələrə cəlb olunmalıdır:

“Xəstəliyin yaranma səbəblərinə gəldikdə isə daha çox yaşayış şəraiti zəif olan insanlarda, sanitar-gigiyenik qaydalara riayət olunmaması, təsadüfi cinsi əlaqələr zamanı meydana gəlir. İmmuniteti zəif olan insanların xəstəliyə yoluxma ehtimalları daha böyükdür”.

 

Həkim-mütəxəssis bəzən qoturluq xəstəliyinə səhv diaqnozların qoyulduğunu, bunun isə xəstəliyin gedişatına mənfi təsir göstərdiyini də nəzərə çatdırıb. Qeyd edib ki, xəstəliyə ən düzgün diaqnoz laborator analizlər nəticəsində qoyulur. Xəstəliyin qarşısı vaxtında alınmazsa, yoluxucu xarakter ala, çox böyük fəsadlar verə bilər. Bəzən həkimlərin səhvi ucbatından qaşınan yerlərə steroid dərmanlar tətbiq olunur.

Qoturun ağırlaşmalarından biri də dermatitlərdir.

 

Baş həkim xəstəliyə düzgün diaqnoz qoyulduğu halda, müalicə müddətinin qısa çəkdiyini də vurğulayıb:

“Belə ki, böyüklərdə 33 % kükürd mazları 5 gün ərzində səhər və axşam, baş və üz nahiyələri istisna olmaqla bədənin hər yerinə sürtülür. Bu müddət ərzində çimmək olmaz, müalicə müddəti ərzində istifadə olunan paltarlar yuyulub-ütülənməli, dezinfeksiya olunmalıdır. Xəstənin müalicə müddəti ərzində istifadə etdiyi yataq dəsti dəyişdirilməlidir.

Uşaqların dərisi daha kövrək olduğundan isə müalicə zamanı dərini yandırmaması üçün 20 % kükürd mazlarından istifadə olunur.

Bununla yanaşı, xəstəliyin müalicəsi üçün benzil - benzatın müxtəlif suspenziyalarından, permitil dərmanının krem və emusiyalarından istifadə olunur”.

 

Mütəxəssisimiz xəstəliyin müalicə müdddətinin tamamlanmasından 2 həftə sonra xəstəyə baxış keçirilməsinin, lazım olarsa, əlavə müalicə kursu təyin olunmasının vacibliyini qeyd edib.