Son günlər Azərbaycanda koronavirusdan sağalanların sayı yoluxanları üstələyib.

Lakin virusdan ölənlərin sayında artım müşahidə olunur. Ötən gün Azərbaycanda daha 449 nəfər koronavirusdan sağalıb, 13 nəfər isə vəfat edib.

Azərbaycanın baş infeksionisti Cəlal İsayev açıqlamasında ölüm sayının artması səbəblərindən danışıb.

Ölüm sayının indiki dövrdə yoluxanlara əsasən hesablanmadığını söyləyən C.İsayev bildirib ki, son günlər virusdan həyatını itirənlər bir müddət öncə yoluxmuş və vəziyyəti ağırlaşdığından xilas edilə bilməyənlərdir:

Yoluxanların hamısı aktiv xəstələr deyil. Ola bilsin ki, yoluxanların arasında virusu çox yüngül və klinik keçirənlər də var. Ağır xəstələr əsasən reanimasiyada olanlar içərisindən hesablanır. Onların arasında təbii ki, ölüm halları da olur. Əsasən yanaşı xəstəliyi olanlarda ölüm halları daha çox baş verir. Xüsusilə, şəkər xəstəliyi, ürək-damar sistemi və tənəffüs sistemində patalogiyası olan insanlarda bu mümkündür. Ona görə də, ölüm sayı müxtəlif - bir gün 5, bir gün 10 nəfər olur".