A qrupu streptokok burun, boğaz və dərinin səthində çox rast gəlinən və çox yayılmış bir mikrobdur. Əksər hallarda xəstəliyə deyil, lakin bəzən boğazda badamcıqların iltihabına (tonzillit) səbəb olur.
Aztibb.az xəbər verir ki, mütəxəssislərin bildirdiyinə görə, daha nadir hallarda, əsasən körpələrdə, ahıl yaşlılarda və immuniteti zəif olanlarda mikrob qana və ya bədənin toxumalarına daxil ola və həyat üçün təhlükə yarada bilər.
İnfeksiya Tonzillit (boğazda badamcıqların iltihabı) də daxil olmaqla bir çox xəstəliyə səbəb ola bilər. Angina zamanı burun-udlaqda qızartı, selikli qişa üzərində ağ nöqtələr şəklində irinli ocaqların yaranması ilə badamcıqların şişməsi və ağızdan pis qoxunun gəlməsi də müşahidə edilir. O, həmçinin dəri örtüklərinin iltihabına səbəb ola bilər.
Streptokok dəri toxumalarında çoxalaraq qanqrenanın yaranmasına səbəb ola və nəticədə nekrotik (ölmüş) toxumaların cərrahi kəsilməsini tələb edə bilər. Lakin streptokok infeksiyasının yaratdığı ən təhlükəli vəziyyət septik şokdur ki, o da, müalicə olunmadıqda ölümlə nəticələnə bilər.
Streptokok həmçinin autoimmun reaksiyalara səbəb ola bilər ki, bu zaman insanın öz immun sisteminin yaratdığı anticismlər oynaqlara, ürək qapaqlarına və böyrək toxumalarına hücum edərək, müvafiq olaraq, revmatoid artrit, revmatik ürək xəstəliyi və qlomerulonefritə gətirir.
Adətən penisilin adlı antibiotik streptokok infeksiyasının müalicəsinin əsasını təşkil edir. Bu, hamıya tanış olan antibiotik ilə müalicə ən azı 10 gün aparılır. Həyati təhlükə yaradan bir infeksiya hallarında isə xəstələrin müalicəsi üçün klindamisin adlı antibiotik yüksək dozada penisilin ilə yanaşı təyin edilir.
Müalicə effekt verməzsə və ya xəstənin penisillinə qarşı allergiyası varsa, əvəzinə sefalosporin qrupundan olan antibiotik təyin edilə bilər. Təəssüflə vurğulanmalıdır ki, Streptokok mikroblarına qarşı hazırda effektiv peyvənd yoxdur.