Birləşmiş Millətlər Təşkilatının Cenevrə ofisinin həftəlik mətbuat konfransında dünyada denqe qızdırması halları ilə bağlı qiymətləndirmələr edilib.

Aztibb.az “TRT Haber”ə istinadən xəbər verir ki, denqe qızdırmasının insanlara yoluxmuş ağcaqanadların dişləməsi ilə bulaşan ən çox yayılmış viral infeksiya olduğuna diqqət çəkilib. Bu xəstəliyin daha çox tropik və subtropik iqlimlərdə şəhər yerlərində müşahidə edildiyi ifadə edilib.

Dünyada təxminən 4 milyard insan denqe virusuna yoluxma riski altındadır. Açıqlamalarda qeyd edilib ki, bu xəstəliyə yoluxanların çoxunda simptomlar yoxdur.

Denqe qızdırmasının əlamətləri arasında yüksək hərarət, baş ağrısı, bədən ağrıları və ürəkbulanma olur. Xəstələrin çoxunun təxminən 2 həftə ərzində sağaldığı, bəzilərində isə bunun ciddi bir xəstəliyə çevrilə biləcəyi qeyd edilib.

Hazırda denqe qızdırmasının spesifik müalicəsi yoxdur, lakin erkən diaqnoz və müvafiq tibbi yardıma əlçatanlıq ağır denqe qızdırmasından ölüm ehtimalını azaldır.

Xəstəliyin başlanğıcından bəri bütün dünyada beş milyondan çox yoluxma hadisəsi və 5000-dən çox ölüm halı qeydə alınıb. İndiyədək 4,1 milyon denqe qızdırmasına yoluxma hadisəsi izlənib.

Ümumiyyətlə "yağışlı dövrlər" kimi tanınan mart, iyun, sentyabr və dekabr aylarında hallar artır.

Xəstəliyə səbəb olan ağcaqanad növləri su hövzələrində sürfələr yaratdığından, mümkün çoxalma sahələrinin daim dezinfeksiya edilməsi lazımdır.