Ümumdünya Səhiyyə Təşkilatının saytında hər il qeyri-sağlam qidalanma və qeyri-sağlam içkilərdən istifadə nəticəsində ölənlərin sayı barədə məlumatlar yer alır.

Aztibb.az “RİA Novosti”yə istinadən xəbər verir ki, təşkilat sağlam davranışı təşviq etmək üçün spirtli içkilərə vergilərin artırılması barədə çağırış edib.

Hər il dünyada 2,6 milyon insan spirtli içkilər səbəbindən ölür. Səkkiz milyondan çox insan pis qidalanmanın qurbanıdır. Bununla belə, əksər ölkələrdə zərərli qida və içkilərə vergilər aşağıdır. Bu barədə Ümumdünya Səhiyyə Təşkilatının saytında bildirilir. İstehlakı müxtəlif xəstəliklərə səbəb olan və insanların ömrünü qısaldan məhsullara verginin aşağı olması insan sağlamlığının yaxşılaşmasına kömək etmir. ÜST bu ciddi məsələyə diqqət yetirməyə və insanları daha sağlam davranış vərdişlərini mənimsəməyə təşviq etmək üçün vergilərin tətbiq edilməsini tövsiyə edir.

“Xəstəliklər az olsa, bütövlükdə cəmiyyət faydalanacaq. Daha az spirt olacaq və daha az zorakılıq və ölümlə nəticələnən qəzalar olacaq”, – ÜST-ün Sağlamlığın Təşviqi üzrə direktoru Rüdiger Kretç buna diqqət çəkib.