Prolaktin testi hansı hallarda aparılır?/ TESTƏ HAZIRLIQ QAYDALARI

18.11.2022 13:12

Prolaktin, ön hipofiz vəzi tərəfindən ifraz olunan və hipotalamus tərəfindən idarə olunan hormondur.

Aztibb.az Referans Medical Group-a istinadla xəbər verir ki, hamiləlik dövründə prolaktin süd vəzilərinin böyüməsini və inkişafını stimullaşdırır, onları laktasiyaya hazırlayır, sarı cismin formalaşmasında və fəaliyyətində rol oynayır; doğuşdan sonra süd ifrazını stimullaşdırır.

Prolaktin testi hansı hallarda aparılır:

• Hipofiz şişləri

• Doğuşdan sonrakı dövrdə laktasiyanın pozulması

• Qalaktoreya ( süd vəzilərindən süd gəlməsi)

• Süd vəzilərində tsiklik ağrı

• Mastopatiya

• Ginekomastiya

• Anovulyasiya (ovulyasiyanın olmaması)

• Oliqomenoreya (menstruasiyanın azalması)

• Amenoreya (menstruasiyanın olmaması)

• Disfunksiyalı uşaqlıq qanaxmaları

• Ağır keçən menopauza

• Sonsuzluq

• Cinsi infantilizm diaqnozu

• Libido azalması (cinsi istəksizlik)

• Piylənmə

• Hirsutizm

• Osteoporoz

Normal insanlarda prolaktin konsentrasiyası yuxu, stress, məşq, cinsi əlaqə və hipoqlikemiya kimi fizioloji stimullara cavab olaraq artır və konsentrasiyalar hamiləlik, laktasiya, doğuşdan sonra və yeni doğulmuş körpələrdə də yüksəlir.

Testə hazırlıq qaydaları:

- Tədqiqatdan əvvəl stresli vəziyyətləri və fiziki fəaliyyəti, o cümlədən cinsi əlaqəni, həmçinin termal prosedurları (hamam, sauna və s.) və spirtli içki qəbulunu istisna etmək lazımdır.

- Prolaktin üçün analiz səhər, oyandıqdan 2-3 saat sonra, 8-14 saat aclıqdan sonra aparılır.

- Müayinədən ən azı bir saat əvvəl siqaret çəkmək tövsiyə edilmir. Test etməzdən əvvəl 20-30 dəqiqə istirahət etməlisiniz.

- Qadınlar test üçün uyğun günləri həkimləri ilə müzakirə etməlidirlər. Adətən menstruasiya dövrünün birinci mərhələsində (menstruasiya başlandıqdan 3-5 gün sonra) verilməsi tövsiyə olunur.