Azərbaycan Respublikasının müxtəlif xəstəxanaları, tibb müəssisələri və qurumlarından olan 8 tibb işçisi “Tibb mütəxəssislərinin infeksion xəstəliklər üzrə bilik və bacarıqlarının təkmilləşdirilməsi: COVID-19 test dəstinin istifadəsi” məzmunlu onlayn təlim proqramında iştirak edir.

Təlim proqramı Koreyanın inkişaf əməkdaşlığı üzrə nümayəndəlik agentliyi olan Koreya Beynəlxalq Əməkdaşlıq Agentliyi (KOICA) və Koreyada tibb sahəsində ən böyük təhsil müəssisəsi olan Yonsei Universitetinin birgə əməkdaşlığı çərçivəsində həyata keçirilir.

KOICA-nın Azərbaycan nümayəndəliyindən verilən məlumata görə, təlim proqramının hazırlanmasında məqsəd böhranın ön cəbhələrində çalışan tibb işçiləri və rəhbərlərinin COVID-19 təhlükəsinə tez və effektiv cavab vermək bacarıqlarının təkmilləşdirilməsi, eyni zamanda, tibb işçilərinin öz sağlamlıqlarının qorunması üzrə bacarıqlarının inkişaf etdirilməsindən ibarətdir. Proqram Koreyanın infeksiyaya nəzarət, pasiyentə qulluq sistemi, nümunələrin toplanması və nəqli, diaqnostik test və müalicə kimi təcrübələri də daxil olmaqla, səkkiz xüsusi moduldan ibarətdir.

Təlim proqramı iyulun 27-dək davam edəcək. Bu müddətdə Yonsei Universitetinin infeksion xəstəliklər üzrə tanınmış professorları COVID-19 üçün diaqnostik test, müalicə üsulları və prosesi məsələlərinə toxunacaqlar.

Təlim tamamlandıqdan sonra iştirakçılar sertifikatlarla təltif ediləcəklər.

Qeyd edək ki, Koreya Respublikası COVID-19 virusuna qalib gələn ilk ölkələrdən biridir. Koreyanın virusa qarşı təsirli tədbirləri çoxsaylı testlərin götürülməsi, aktiv izləmənin həyata keçirilməsi və xəstələrin sürətli müalicəsinin aparılmasına əsaslanır. K-karantin modeli COVID-19 pandemiyasına cavab vermək üçün dünyada tətbiq edilə biləcək ən optimal modeldir.