Tədbirdə çıxış edən klinikanın Revmatologiya şöbəsinin həkim-rezidenti Səmədova Səltənət revmatik xəstəliklər olan kəskin revmatik qızdırma, revmatoid artrit, qırmızı qurd eşənəyi və sistem skleroz haqqında ətraflı məlumat verib.

 

İlk öncə "Kəskin revmatik qızdırma"dan danışan həkim bu xəstəliyin 4-15 yaş arası uşaqlarda görüldüyünü və faringitdən sonra yaranan xəstəlik olduğunu bildirib. O, xəstəliyin əlamətlərinin böyük və kiçik əlamətlər olmaqla 2 yerə bölündüyünü qeyd edib:

 

"Böyük əlamətlərə oynaqların(75%), ürəyin(45%) zədələnməsi, dəridə düyünlərin əmələ gəlməsi, həlqəvari eritema və Sydenham xoreyası, kiçik əlamətlərə isə hərarət, artralqiya, P-R intervalın uzanması, yüksək EÇS, CRP və leykositoz aiddir".

 

Ardınca "Revmatoid artrit" haqqında məlumat verən həkim bu xəstəliyin, əsasən, kimlərdə rast gəlindiyi və hansı fəsadlar yaratdığı haqqında danışıb:

 

"Ən çox rast gəlinən xroniki iltihabi multifaktorlu sistem xəstəlikdir. Özünü simmetrik poliartrit kimi göstərir, xüsusən xırda oynaqları zədələyə, deformasiyala gətirib çıxara bilər. Oynaqdan kənar əlamətlər də olur. 45-60 yaş arası qadınlarda daha çox rast gəlinir. Bu xəstələrdə RF və Anti-CCP, adətən, müsbət olur".

 

S.Səmədova "Qırmızı qurd eşənəyi" xəstəliyi barədə də ətraflı məlumat verib. Qeyd edib ki, bu xroniki autoimmun xəstəlikdir. Bu zaman insan immuniteti hiperaktiv olur və orqanizm öz normal hüceyrə və toxumalarına hücum edir:

 

"Daha çox 15-45 yaş arası qadınlarda və müəyyən etnik qruplarda rast gəlinir. Xəstəliyin əmələ gəlmə səbəbləri arasında, əsasən, genetik və ətraf mühit faktorları(günəş şüası, infeksiya, bəzi dərmanlar) rol oynayır. Əsas dəri zədələnməsi ilə özünü göstərir və üzün kəpənəkvari eriteması, diskoid qırmızı qurd eşənəyi, alopesiyaya gətirib çıxara bilir. Daxili orqanlardan ən çox böyrəkləri və mərkəzi sinir sistemini zədələyir. Serozit, qan dəyişikliyi, sinovit kimi fəsadlar da verə bilər. ANA, Anti-Sm, Antifosfolipid antitel müsbət olur".

 

Həkim daha sonra "Sistem skleroz" haqqında danışıb: "Sistem skleroz - birləşdirici toxumanın səbəbi bilinməyən xəstəliyidir. Autoimmun pozuntu, vasculopatiya, fibrozla və sclerodaktiliya ilə xarakterizə olunur. Əsasən, 35-65 yaş arası qadınlarda rast gəlinir. Bu xəstəlikdə CREST sindromu da olur: C-calcinoz, R-Reyno fenomenı, E-ezofaqopatiya,S-sclerodaktiliya,T-teleanqioektaziya",- deyə həkim qeyd edib.

 

O, bildirib ki, xəstəlik daxili orqanlardan ən çox ağ ciyəri zədələyir, interstisial pnevmoniya və pulmonar hipertenziya əmələ gətirə bilir.

 

Geniş müzakirə şəraitində keçən seminarda rezidentlər öz fikirlərini bölüşüb, onları maraqlandıran suallara aydınlıq gətirilib.