Aztibb.az xəbər verir ki, tanınmış həkim-reanimatoloq Şahin Məmmədov "Facebook"da bu barədə tövsiyələr verib.

 

Həkim bildirib ki, hər gün kardio proqramı ilə idman edənlərin dieta saxlaması məsləhət görülmür. Bunlardan birini seçmək lazımdır: ya dieta, ya da idman.

 

Əvvala kardio kəskin dieta ilə birgə həm müqavimətin, immunitetin kəskin düşməsinə, həm də malnutrisiona, nəticə etibarilə şəkərli diabet və xərçəngə səbəb ola bilər:

 

"Kardio və ciddi dieta birlikdə maddələr mübadiləsinin sürətini aşağı salmaqla arıqlamağa mane ola bilər. Əsas məsələ maddələr mübadiləsinin sürətini yüksəltməkdir. Bu, gün ərzində yarım saat kardio hərəkətləri (qaçış, velotrenajor və s.) ya uzun məsafəyə yürüyüş etməklə əldə oluna bilər. Kəskin ciddi dieta mübadilə sürətini aşağı salacaq deyə, məsləhət deyil. Qaçış aparatında itirilən kalori miqdarına isə fikir verməyin. Sizin məqsədiniz çoxlu kalori itirmək, kalori defisiti yaratmaq yox, mübadilə sürətini artırmaq olmalıdır. Mübadilə sürəti ən vacib amildir. Bəzilərinin nə yeyirsə yesin daim arıq qalmağının, bəzilərinin isə tez bir zamanda kökəlməsinin səbəbi mübadilə sürəti ilə əlaqədardır".