"Tibbin inkişaf etdiyi bir dövrdə travmalar zamanı sınıqçıya gedilməsini düzgün hesab etmirəm".

Aztibb.az APA-ya istinadla xəbər verir ki, bunu Elmi-Tədqiqat Travmatologiya və Ortopediya İnstitutunun direktoru Elviz Qasımov "TƏBİB məsləhəti"ndə deyib.

O bildirib ki, sınıqçılar bəzən xəstələri daha ağır vəziyyətə salır:

"Standart bir söz var ki, "sümük çıxmışdı, yerinə saldım". Bunu bəzən topuq oynağında, bəzən diz oynağında deyirlər. Hansı ki, topuqda və dizdə çıxıq üçün çox ciddi travma olması lazımdır. Topuq 3 yerdən sındıqdan sonra çıxa bilər. Bu səbəbdən vəziyyəti fəsadlaşaraq gələn xəstələrim az deyil. Sınıqçılar arasında möhkəm dartmalar, sərt masajlar nəticəsində xəstənin aldığı travmanı şiddətləndirənlər çoxdur. Mütəxəssis varsa, nə üçün sınıqçıya gedilməlidir?!".

O deyib ki, sınıq və ya çıxıq şübhəsi varsa, dərhal mütəxəssisə müraciət edilməlidir:

"Gecikmələr bir çox fəsadlara gətirib çıxarır. Əgər vətər qopubsa, o, 3 həftədən sonra yapışır və onu dartıb yerinə salmaq çətin olur və ya sümük sınıbsa, 3 həftə ərzində bitişmə başlayır. 3 həftəyə qədər yumşaq sümük birləşir, 3 həftədən sonra sınıq yeri bərkiməyə başlayır. Bu zaman təzədən sümüyü sındırıb düzəltmək lazım olur".