Cökə çiçəyi çayı dünyada ən çox içilən dərman bitkilərindən biridir və olduqca maraqlı quruluşa malikdir. Cökə çiçəkləri formaca daha çox yarpağa bənzəsə də, əslində həqiqi yarpaqlarından görünüş və rəng cəhətdən fərqlidir. O, bal ətri verir, dünyada daha çox əsəb sakitləşdirici kimi içilir, həmçinin tərlədici və bədəni yumşaltmaq xüsusiyyətlərə malikdir.

 

Aztibb.az xəbər verir ki, bu barədə həkim-fitoterapevt Fizuli Hüseynov cökə çiçəyi çayının faydalarından danışarkən məlumat verib.

 

"Axşam yatmazdan əvvəl 1 stəkan içilib yatanda yuxunu dərinləşdirir, həmçinin bədən, əl, ayaq soyuqluğundan əziyyət çəkənlər üçün əvəzolunmaz bir vasitədir", deyə həkim bildirib.

 

Həkim-fitoterapevt ABŞ-ın Çikaqo Universitetində aparılmış bir eksperimentdən də bəhs edib. 

 

F.Hüseynovun sözlərinə görə, eksperiment zamanı soyuqdəyməli xəstələri 3 qrupa bölüblər: birinci qrupa antibiotik, ikinci qrupa həm antibiotik, həm cökə çiçəyi çayı, üçüncü qrupa isə təkcə cökə çayı verərək müalicə ediblər. Nəticədə tək cökə çayı verilmiş üçüncü qrup xəstələr həm tez sağalıb, həm də xəstəliyin fəsadı qalmayıb.

 

"Cökə çiçəyinin heç bir zərərli təsiri olmadığından soyuqdəymə zamanı ondan tərləyənə qədər bol-bol içmək olar. Zoğal və ya moruq mürəbbəsi ilə içdikdə daha tez tərlədir. Cökə, eyni zamanda qan təzyiqini aşağı salır, çox istifadə edənlər bunu nəzərə alaraq dəmləməyə bal əlavə etməlidirlər. Yüksəlmiş temperaturu aşağı salır, öskürək və ürək döyüntülərinin artması zaman çayın içilməsi faydalıdır", - deyə həkim qeyd edib.