Nefroloq və uroloq - İnsanların səhv saldığı həkimlər - aztibb.az AZƏRBAYCANIN SƏHİYYƏ XƏBƏR PORTALI

Nefroloq və uroloq - İnsanların səhv saldığı həkimlər

04.03.2022 17:37

Nefrologiya qərb tibbində ən vacib və önəmli sahələrdən biri olmasına baxmayaraq ölkəmizdə o qədər də aktual sahə deyil və bu gün də böyrəklərində xəstəliyi olan pasiyentlər ilk növbədə uroloqa müraciət edir. Hətta insanların bir çoxu nefroloq sözünü eşidəndə "o nə həkimidir?" deyə sual verir. Bəs əslində necə olmalıdır? Nefroloq kimdir, uroloqdan fərqi nədir və hansı xəstəlikləri müalicə edir?

Aztibb.az xəbər verir ki, həkim-nefroloq Müşfiq Bəbirov bu barədə məlumat paylaşıb. O, bildirib ki, nefroloqun səlahiyyətlərinə qlomerulonefrit, pielonefrit, urolitiyaz, polikistik böyrək xəstəliyi və böyrək çatışmazlığı kimi xəstəliklərin müalicəsi daxildir. Məhz bu mütəxəssis, məsələn, böyrək transplantasiyasından sonra xəstələri müşahidə edir.

Uroloq daha geniş ixtisasa malik həkimdir. O, genitouriya sisteminin və onun ayrı-ayrı orqanlarının xəstəliklərinin diaqnostikası, öyrənilməsi, müalicəsi və profilaktikası ilə məşğul olur. Onun fəaliyyət sahəsinə sistit, stress sidik qaçırma, fimoz, balanit, sidik kisəsi daşları, pielonefrit və sidik-cinsiyyət sisteminin bir çox iltihabi xəstəliklərinin müalicəsi daxildir.

Nefrologiya isə terapevtik sahə olub böyrəyin funksiyasının pozulmasına səbəb olan xəstəlikləri müalicə edir. Daha konkret olaraq bu patologiyalarla nefroloq məşğul olmalıdır:

- Arterial hipertoniya, onun müalicəsi və monitorinqi;

- Su - elektrolit balansına nəzarət;

- Kəskin və xroniki böyrək çatışmamazlığı;

- Qlomerulonefritlər;

- Sidik yollarının xroniki infeksiyaları (bununla eyni zamanda uroloq da məşğul olur);

- Şəkərli diabetin səbəb olduğu nefropatiyalar;

- Sistem xəstəliklərinin səbəb olduğu nefropatiyalar;

- Böyrəklərlə bağlı olan müxtəlif sindromlar və s.

Cərrahi problemlərlə uroloqlar məşğul olur. Sidik yolları və böyrək axarlarının xəstəlikləri, böyrək daşlarının xaric olması, sidik və cinsi sistemin anatomik problemləri, böyrəküstü vəzin xəstəlikləri, cinsi problemlərlə, onkoloji problemlərlə uroloqlar məşğul olur.

Beləliklə, böyrək funksiyalarının pozulması hallarında nefroloq, sidik cinsi sistemin anatomik, cərrahi və onkoloji problemləri zamanı uroloq müalicə etməlidir.