Azərbaycan Könüllü Həkimlər Assosiasiyasının (AKHA) təşkilatçılığı və Tibbi Ərazi Bölmələrini İdarəetmə Birliyinin (TƏBİB) dəstəyi ilə təşkil olunan “Azərbaycan regionlarında şəhid ailələri və qazilərin sağlamlığı” adlı layihə çərçivəsində növbəti tibbi aksiya Saatlı Rayon Mərkəzi Xəstəxanasında keçirilib.

Bu barədə Aztibb.az-a Azərbaycan Tibb Universitetindən məlumat verilib.

Bildirilib ki, aksiya çərçivəsində 20 ixtisas üzrə 35 könüllü həkim Saatlı, Sabirabad və İmişli rayonlarında yaşayan şəhid ailələrinin üzvlərini, qaziləri müayinə və müalicə ediblər.

Paytaxtın müxtəlif dövlət və özəl xəstəxanalarında çalışan kardioloq, onkoloq, radioloq, terapevt, pediatr, nevroloq, uroloq və digər ixtisaslar üzrə həkimlərin müayinəsindən 200-də çox şəxs keçib, zəruri dərman preparatı ilə təmin olunublar.

Xəstəlik aşkarlanmış vətəndaşların tam müayinədən keçməsi, zərurət yaranan cərrahi əməliyyatların isə növbəti aksiyalarda icra edilməsi planlaşdırılır.

Qeyd edək ki, regionlarda aksiyanın ardıcıl olaraq keçiriməsi nəzərdə tutulur.