Ümumdünya Səhiyyə Təşkilatının (ÜST) hələ ki, "omikron" ştamının koronavirusun digər variantlarından daha yoluxucu olduğuna dair məlumatı yoxdur.

Aztibb.az xəbər verir ki, bu barədə ÜST-ün Cenevrədəki mənzil qərargahının yeni ştamla bağlı yenilənmiş məlumatlarında deyilir.

Məlumatda bildirilir: "Omikron" ştamının "delta" variantı da daxil olmaqla digər variantlarla müqayisədə daha yoluxucu (yəni insandan insana daha asan keçən) olub-olmadığı hələ aydın deyil".

Qeyd edək ki, koronavirusun ilk dəfə Afrikanın cənubunda aşkarlanan B.1.1.529 ştamına "omikron" adı verilib. Bildirilib ki, sözügedən ştamda çox sayda mutasiyalar mövcuddur və digər ştamlardan daha yoluxucu olması ilə bağlı şübhələr var.

Ehtiyat tədbiri olaraq, bir sıra ölkələr Cənubi Afrika Respublikası və Afrikanın cənubundakı digər dövlətlər üçün sərhədlərini bağlayıblar.