Zaqatalanın 2020-ci ilin əvvəlindən – yəni koronavirus pandemiyasının tüğyan etdiyi aylarda aqrar sektorda əldə etdiyi nəticələrin, demək olar ki, hamısı uğurludur. Kənd təsərrüfatının bütün sahələrində artım, inkişaf görünür. "Xalq qəzeti"nin Rayon İcra Hakimiyyətinin başçısı Mübariz Əhmədzadə və Zaqatala Dövlət Aqrar İnkişaf Mərkəzinin bitkiçilik sektorunun müdiri Vaqif Şabanov ilə müsahibəsi zamanı bu məsələ xüsusilə qabardılıb.
M.Əhmədzadə qeyd edib ki, bu gün əsas məsələlərdən biri də payızlıq dənli bitkilərin səpininə hazırlaşmaqdır: Bu il rayonda 11 min hektar sahədə payızlıq dənlilərin səpini proqnozlaşdırılır. Bu məqsədlə təsərrüfatlarda yay şumunun çıxarılmasına başlanılıb. İndiyədək 3500 hektardan çox sahədə yay şumu qaldırılıb. Səpin aparılacaq sahələrin şumlanmasına 70-dək şum traktoru cəlb olunub.
V.Şabanov isə bildirib ki, payızlıq bitkilərin səpininə sentyabrın üçüncü ongünlüyündə başlamaq nəzərdə tutulur. Xatırladaq ki, builki mövsümdə zaqatalalı fermerlər 11 min 320 hektar taxıl sahəsindən 35 min 50 ton məhsul götürüblər. Hər hektara görə orta məhsuldarlıq 31 sentner təşkil edib. Taxıl istehsalı əvvəlki illə müqayisədə 1881 ton artıb.
Gündəlikdə olan məsələlərdən biri də kartofçuluğun unkişaf etdirilməsidir. Artıq rayonun təsərrüfatlarında kartof yığımı başa çatıb. Məhsul istehsalçıları builki mövsümdə 1584 hektar sahədən 19 min 87 ton məhsul götürüblər. Hər hektardan orta məhsuldarlıq 120,5 sentner təşkil edib. Kartof istehsalı əvvəlki illə müqayisədə 220,5 ton artıb.
Təsərrüfatlarda tərəvəz, lobya, meyvə və bostan məhsullarının yığımı isə hələlik davam edir. İndiyədək tərəvəz əkilmiş 2155 hektar sahənin 1489 hektarının məhsulu yığılıb, 9 min 667 ton tərəvəz istehsal edilib. Məhsul istehsalı keçən ilin müvafiq dövrü ilə müqayisədə 146 ton artıb. Eyni zamanda, rayonda indiyədək 377 ton lobya, 2601 ton meyvə, 23,5 ton yaşıl çay yarpağı, 4700 ton bostan məhsulları istehsal olunub.
Qeyd olunub ki, rayonda aqrar sektorun inkişafı ilə yanaşı, əhaliyə göstərilən xidmətlər, sahibkarlığın dəstəklənməsi, yeni iş yerlərinin yaradılması, ümumiyyətlə, sosial həyatın bütün sahələri ilə bağlı da çoxsaylı tədbirlər həyata keçirilir.
