Tibb və sağlamlıq sahələrinin nümayəndələrinin maraqla gözlədiyi "Global Health Awards" layihəsinin qala gecəsi 21 noyabr tarixində "Fairmont Baku" otelində baş tutub. Sözügedən tədbir ilk dəfə paytaxtımızda təşkil olunduğundan layihə xüsusi rəğbət qazanıb.
Aztibb.az xəbər verir ki, tədbirdə tibb və sağlamlıq sektorunun həm yerli, həm qardaş Türkiyədən, həm də xarici ölkələrdən olan tanınmış və peşəkar həkimləri, eləcə də bu sektorun nüfuzlu markalarının nümayəndələri iştirak ediblər.
Layihənin əsas məqsədi peşəkar həkimləri və tibb şirkətlərini ictimaiyyətə daha da yaxından tanıtmaq, onların fəaliyyətini qiymətləndirmək və motivasiya verməkdir.
Qala gecəsində səhiyyə sektorunun bir sıra nümayəndələri tibb sahəsindəki xidmətlərinə görə "Global Health Awards - 2021" mükafatına layiq görülüblər.
Təltif olunanlar sırasında ölkənin tanınmış həkim-stomatoloqu, psixologiya üzrə fəlsəfə doktoru Xalidə Nəsirova da var.
Qeyd edək ki, Dr. Xalidə Nəsirova Azərbaycan Tibb Universitetini qırmızı diplomla bitirib. Bir sıra beynəlxalq seminar və konfransların aktiv iştirakçısı olan həkim estetik stomatologiya sahəsində ölkədə tanınmış mütəxəssisdir.
