Payız aylarında temperatur düşdüyü üçün immunitetini qaldırmaq istəyənlərin bitki çaylarına tələbatı artıb. 

Həm pandemiya, həm də mövsümi xəstəliklərdən qorunmaq istəyənlərin maraq göstərdikləri bitki çaylarına əsasən cökə, adaçayı, şüyüd, yaşıl çay, çobanyastığı, lavanda, rozmarin, zəncəfil, zerdeçal və darçın kimi otlar daxildir. 

Aztibb.az mütəxəssislərin rəyinə əsaslanaraq xəbər verir ki, düzgün istehlak edilmədikdə bitkilər insan sağlamlığını təhdid edə bilər. 

Bitki çayları gəncdən qocaya, hamilədən körpəyə hər yaşda qəbul edildiyindən çoxlu səhvlərə yol verilir. Halbu ki, bitki çaylarının da dərmanlar qədər diqqətli qəbul edilməsi şərtdir.

Nə qəbul ediriksə, doğru mənbədən məlumat almalıyıq. İndi hər kəs internetdən istifadə edir, amma orada da doğru məlumat olduğu kimi yanlış məlumatlar da var. Mənbənin etibarlı olub-olmadığını bilmək lazımdır. Həmçinin istehlak edilən dozaya da diqqət yetirmək vacibdir.

Məsələn, hamilə qadınlar və süd verən analar çox vaxt bitki çayları qəbul edirlər. Eyni zamanda, osteoporoz, ürək xəstəliyi, şəkərli diabet, xərçəng diaqnozu qoyulmuş analar dərman da qəbul edirlər. Belə olduqda, daha diqqətli olmalıdırlar. Çünki bitki çaylarında aktiv maddələr var və onların istifadə etdiyimiz dərmanlarlala reaksiyaya girə biləcəyini unutmamalıyıq.

Bundan əlavə, bitkilərin hazırlanma üsullarına da diqqət etmək vacibdir. Bəzi bitkilər dəmlənərək, bəzilərinin isə qaynadılaraq içilir. Odur ki, bitki çayı hazırlayarkən, xüsusən də qurudulmuş otlardan istifadə edərkən, mütəxəssislərdən, aromaterapistlərdən, fitoterapistlərdən, apteklərdən və ya dietoloqlardan mütləq məsləhət almaq lazımdır.