İsti yay günlərini yaşayırıq. Çoxları şəhərdən kənara çıxıb dəniz kənarında dincəlməyə gedir. Dəniz uşaqların da sevdiyi istirahət məkanıdır. Necə edək ki, uşaqlarımız dəniz kənarında, çimərliklərdə özlərinə ziyan vurmadan yaxşı dincələ bilsinlər? Ümumiyyətlə, uşaqları neçə yaşdan dənizə aparmaq olar?

 

Aztibb.az xəbər verir ki, bu barədə “Həkim məsləhəti” rubrikasında Mərkəzi Gömrük Hospitalının pediatr-neonatoloq-reanimatoloqu Təranə Göyüşova dənizdə istirahəti rahat və təhlükəsiz keçirmək üçün öz tövsiyələrini bölüşüb.

 

Həkimin sözlərinə götə, valideynlər bilməlidir ki, 6 ayı tamam olana qədər uşaqları dənizə aparıb suya salmaq olmaz. Lakin dəniz havasında gəzdirmək olar. 6 aydan sonra isə dənizə aparıb suya salmaq olar.

 

- Dənizin təmiz olmasına diqqət etmək lazımdır. Natəmiz olan yerdən uşaqlara infeksiya keçə, onların səhhətində problemlərə yol aça bilər.

- Dəniz suyu duzlu olduğuna görə, uşağı suda 20 dəqiqədən çox saxlamaq olmaz. Uşağı sudan çıxaran kimi dərhal təmiz su ilə yuyub qurulamaq lazımdır.

- Uşaqları təmiz dəsmal ilə quruladıqdan sonra mütləq günəş şüalarından qoruyan kremlər çəkmək lazımdır. Bu kremlər uşaqları ultrabənövşəyi şüaların təsirindən qoruyur, yanıqların yaranmasının qarşısını alır. Günəşdən qoruyan kremi uşağın bədəninə həm suya girməzdən 20 dəqiqə əvvəl, həm də sudan çıxdıqdan sonra hər 1,0-1,5 saatdan bir çəkmək məsləhətdir.

- Uşaqları saat 11-ə qədər, ya da 17-18-dən sonra çimərliyə aparmaq məsləhətdir. Amma D vitamini sintezi saat 11-15 arasında getdiyi üçün uşaqları həmin müddətdə 10 dəqiqəlik də olsa, kölgəli yerdə saxlamaq lazımdır.

- Uşaqlar kölgədə qum və su ilə oynamağı sevir. Özünüzlə günəşdən qorunmaq üçün çətir, kiçik hava ilə doldurulan hovuz və yerə sərmək üçün adyal və ya yüngül xalça götürün.

- Dəniz kənarında 5-10 saat vaxt keçirmək planınız varsa, dondurulmuş su, istidən tez xarab olmayan məhsullar, meyvə-tərəvəz götürün. Dondurulmuş su istiləndikcə, gün ərzində istifadə edə biləcəksiniz.

- 2 yaşından yuxarı uşaqların qum və su ilə oynaması üçün qablar (formalar) alın. Özünüzlə kiçik vedrə də götürün, belə ki, bu vedrənin suyu ilə uşaqlar yeməkdən qabaq əllərini və ayaqlarını rahat yuya biləcəklər.

- Suya girərkən uşaqların başlarına papaq qoyun, gözlərinə eynək taxın, qollarına qolcuqlar geyindirin. Xilasedici jilet və halqalardan istifadə etməyi onlara öyrədin.