Aprelin 13-də Qida Təhlükəsizliyi Agentliyinin (AQTA) sədri Qoşqar Təhməzli Belarus Respublikasının Kənd təsərrüfatı və ərzaq naziri Krupko İvan İvanoviçlə görüşüb.

Agentliyin İnformasiya təminatı və innovativ həllər şöbəsindən Aztibb.az-a verilən məlumata görə, görüşdə Qoşqar Təhməzli iki ölkə arasında əməkdaşlığın genişləndirilməsindən məmnunluğunu ifadə edib. O, son dövrlərdə Azərbaycanda qida təhlükəsizliyinin təmin olunması və inkişafı sahəsində həyata keçirilən tədbirlər, qəbul olunmuş qərarlar barədə ətraflı məlumat verib.

Agentlik sədri ölkəmizdə heyvan sağlamlığının təmin olunması, baytarlıq nəzarəti sahəsində işin daha səmərəli təşkili və heyvanların identifikasiyası sisteminin qurulması ilə əlaqədar görülən tədbirlərdən danışıb. Bildirib ki, heyvan sağlamlığının təmin olunması sahəsində əməkdaşlığın genişləndirilməsi, baytarlıq dərmanlarının istehsalında Belarus Respublikasının təcrübəsinin öyrənilməsi, həmçinin qida təhlükəsizliyi sahəsində informasiya sistemlərinin inteqrasiyası iki ölkə arasında münasibətlərin inkişafına yeni töhfələr verəcək.

Daha sonra çıxış edən Belarusun Kənd təsərrüfatı və ərzaq naziri Krupko İvan İvanoviç ölkələr arasında qida təhlükəsizliyi sahəsində əlaqələrin genişləndirilməsi üçün böyük potensialın olduğunu qeyd edib. O, heyvan sağlamlığı, baytarlıq dərmanları, yem və yem əlavələrinin tədqiqi və qeydiyyatı, eləcə də elmi-tədqiqat mərkəzləri arasında əməkdaşlığın əhəmiyyətini vurğulayıb.

Görüşdə Azərbaycanla Belarus arasında qida məhsullarının idxal-ixrac əməliyyatları zamanı tətbiq olunan nəzarət tədbirləri müzakirə olunub. Qida təhlükəsizliyi, baytarlıq və fitosanitariya sahəsində Belarusun ixtisaslaşmış universitetləri ilə birgə təlim və seminarların təşkilinə dair fikir mübadiləsi aparılıb.

Sonda Krupko İvan İvanoviç AQTA sədrini bu il iyunun 1-dən 5-dək keçiriləcək "Belagro" sərgisinə dəvət edib.