Pandemiya başlayan gündən bəri insanlar eyni səhvləri təkrar edirlər. Qızdırma başlayan kimi antibiotik qəbul edirlər. Bu səhv ucbatından həm müalicə zamanı problemlər yaranır, həm də antibiotikin yan təsirlərinə görə xəstələrin vəziyyəti ağırlaşır. Antibiotiki şəkərli diabet, immun çatışmazlığı olan xəstələrə yazmaq olar (mümkün qədər gec). Bu, ən həssas məqamdır. Həkimlər belə xəstələrə individual olaraq antibiotikin başlanma tarixini seçə bilər.

Aztibb.az xəbər verir ki, həkim-anestezioloq Şahin Məmmədov koronavirusun müalicəsi zamanı ən çox təkrarlanan səhvlər barədə etdiyi paylaşımda belə deyib.

O, bildirib ki, poliklinika həkimləri aspirin kardio, kardiomaqnil kimi preparatları lazım olsa da, olmasa da xəstələrə yazırlar. Nəzərə almaq lazımdır ki, COVID-19-un yaratdığı koaqulopatiyada trombositlərin heç bir “günahı” yoxdur. Aspirin trombositə qarşıdır. Aspirin yalnız əvvəlcədən başqa problemə görə ömürlük aspirin içməli olan xəstələrə təyin edilməlidir:

"Risk qrupundan olan xəstələrə antikoaqulyant verilməlidir. (yalnız kleksan, yaxud heparin). Əgər pasiyent lazımsız yerə aspirin içibsə, trombositopeniyaya görə antikoaqulyantlar qanaxmalar yarana bilər.

Sistem o xəstələrə ehtiyatla tətbiq olunur ki, onlar heç cür su içə bilmir. Ya içdiyini qaytarır, ya da diareyası var. Və ya tam başqa bir səbəbə görə məsələn, diabetik ketoasidozu var. Onların da sisteminə heç bir əlavə preparat qoşmaq lazım deyil. Digər su içə bilən xəstələrə isə sistem qoşmaq olmaz. Ən yaxşı ağciyər quru ağciyərdir. Sistemlərlə maye qoşulması iltihablaşmış ağciyəri olan xəstələri daha da ağırlaşdırır".

Həkimin sözlərinə görə, evdə müalicə alanlara metilprednizolon, deksametazon təyin etmək olmaz. Deksametazon sutkada 6 mq-dan çox olmamaq şərtilə yalnız oksigen müalicəsi alan xəstələrə verilməlidir. Xəstəxanada oksigen alan xəstəyə deksametazon təyin olunubsa, 6 mq-dan yüksək doza bakterial infeksiya riskini artırır.