Qalxanabənzər vəzin papilyar xərçəngi bu vəzin bütün xərçəngləri arasında ən çox rast gəlinən (təxminən 80%) növüdür. Papilyar xərçəngə tutulma hər yaşda mümkündür. Lakin adətən 20-70 yaş, xüsusilə də qadınlar arasında daha çox rast gəlinir. Yaş artdıqça papilyar xərçəngin rastgəlmə tezliyi də artmaqdadır.

Bu barədə ümumi cərrah, uzman Elnur Piralıyev sosial şəbəkədə məlumat verib.

Həkim bildirib ki, yavaş gedişata sahib olduğu üçün bu xəstəlik gec aşkar edilir. Adətən qalxanabənzər vəzin bir payında olur. İlkin olaraq boyundakı limfa düyünlərinə metastaz (yayılma) verir:

“Diaqnozun qoyulmasında boyun ultrasəs müayinəsi və incə iynə aspirasiya biyopsiyası kifayət edir. İrəliləmiş vəziyyətlərdə isə boyun MRT və KT ilə dəyərləndirməyə ehtiyac görülür.

Müalicəsi cərrahidir. Əməliyyatdan sonra histopatoloji incələməyə və xəstəyə aid faktorlara görə radiaktiv yod müalicəsi təyin edilə bilər”.

Həkim əlavə edib ki, qalxanabənzər vəzin papilyar xərçəngi zamanında təsbit edilib, düzgün cərrahi əməliyyat və müvafiq müalicə aparılarsa, bu xəstəlikdən 100 faiz xilas olmaq mümkündür.