“Blender baby” adlandırılan uşaqlar əlavə qidaya keçdikdən sonra qidaların davamlı olaraq blender ilə üyüdülüb hazırlanmasına bağlı onları hər zaman horra şəklində qəbul etməyə öyrəşmiş və buna görə də irəlidə tikə halında olan bütün qidaları öyüyən (reflyuks), qaytaran uşaqlardır. Qidaları daim udmağa hazır formada qəbul edən bu uşaqlarda çeynəmə və udma refleksləri get-gedə zəifləyir. Bu zaman diş çıxarmada və nitqdə gecikmə görülə bilər.

Aztibb.az xəbər verir ki, bu barədə həkim-pediatr Günay Rəsulova sosial şəbəkədə paylaşım edib. 

Həkimin sözlərinə görə, bu uşaqlara qatı və tikə halında qida verdikdə onlarda ağlamaq, öyümək, yeməyi tüpürüb çıxarmaq və iştahsızlıq kimi əlamətlər görülür: "Nəticədə uşaqda çəki almada zəifləmə, inkişaf geriliyi, çox qusmağa bağlı qidadan get gedə tamamilə imtina, keçmək bilməyən öskürəklər görülə bilər".

G.Rəsulova bu problemlərin qarşısını almaq üçün ən gec 8 ayından blenderden istifadəni dayandırmağı məsləhət görüb.

"Bunun üçün əlavə qidanı çəngəllə əzib, balaca tikələr şəklində verməlisiniz ki, uşaq həm bu qidaları çeynəməyə, həm də udmağa öyrəşsin. Blenderə öyrəşmiş uşaqlara bu vərdişi tərgitmək üçün qidaların bu cihazla hazırlanmasına son qoymalı və bu işdə müalicəvi dəstək üçün də pediatra müraciət etməlisiniz. "BLW" metodu ilə qidalanma da (yeməyi yeməsi üçün uşağın özünə vermək) udma və çeynəmə reflekslərinin təkmilləşməsinə kömək edir", - deyə həkim-pediatr əlavə edib.