Professor Surxay Musayev ATU-nun Fəxri Fərmanı ilə təltif olunub

01.02.2021 15:45

Ölkəmizdə tibb elminin inkişafına, xüsusilə uşaq xəstəlikləri ilə mübarizə işinə öz töhfəsini vermis dəyərli alimlərimizdən olan Azərbaycan Tibb Universitetinin (ATU) Tədris Terapevtik Klinikasının direktoru, Əməkdar həkim, Əməkdar elm xadimi, tibb elmləri doktoru, professor Surxay Musayev 70 illik yubileyi münasibətilə ATU-nun Fəxri Fərmanı ilə təltif olunub.

Professor S.Musayev ATU-nun rektoru, professor Gəray Gəraybəylinin göstərişi ilə “Tibbi kadrların hazırlanması sahəsində uzunmüddətli və səmərəli xidmətlərinə görə, nümunəvi əməyinə və universitetin ictimai həyatında fəal iştirakına görə” Fəxri Fərmanla təltif olunub.

Fərman ATU-nun Həmkarlar İttifaqı Komitəsinin sədri Cahangir Qasımov və universitetin Təsərrüfat və Təchizat şöbəsinin müdiri Elçin Əlizadə tərəfindən təqdim olunub.

Professor Surxay Musayev respublika və bir çox xarici ölkələrdə çap olunmuş 150-dən çox elmi əsərin, o cümlədən dərs vəsaitlərinin, metodik tövsiyyələrin və monoqrafiyanın müəllifidir. Uşaq revmatologiyası üzrə tanınmış mütəxəssis kimi respublikada bu tibbi xidmət sahəsinin daha da təkmilləşdirilməsi üçün bütün güc və biliyini sərf edir. 2010-cu ildə Azərbaycan Respublikası Prezidenti İlham Əliyevin sərəncamı ilə yaradılmış Azərbaycan Tibb Universiteti Tədris Terapevtik Klinikasının direktoru vəzifəsinə təyin olunub. 2000-ci ildə Respublika Prezidentinin Sərəncamı ilə “Əməkdar həkim”, 2010-cu ildə “Əməkdar elm xadimi” fəxri adına layiq görülüb.