Almaniyanın aparıcı rəqəmsal media qurumu Axel Springer 2021-ci ilin "Şərəf mükafatı"nın qaliblərinin adlarını açıqlayıb. Bu mükafata koronavirus əleyhinə peyvəndi ixtira edən, türk həkimlər - professor Uğur Şahin və Dr. Özlem Türeci layiq görülüblər.
Aztibb.az bu barədə www.medimagazin.com.tr-yə istinadən xəbər verir.
"Xərçəngə dair aparılan araşdırmalardakı nailiyyət insan həyatını xilas etməyə kömək edə bilər. BioNTech-in qurucuları isı artıq COVID-19 peyvəndi ilə dünyaya ümid verir. Koronavirusa qarşı vaksin bizim azadlığımızı qaytarmaq və insanların həyatlarıını xilas etmək potensialına malikdir", - deyə media qurum açıqlamasında bildirilib.
Məlumat üçün bildirək ki, Amerikanın əczaçılıq nəhəngi “Pfizer” ilə hər iki həkimin həmtəsisçisi olduğu Almaniyanın “BioNTech” firmasının yeni tip koronavirusa qarşı hazırladıqları potensial vaksinin virusa qarşı 95% təsirli olduğu açıqlanıb.
Mükafatlandırma mərasiminin 2021-ci ilin yazında keçirilməsi planlaşdırılır.
Qeyd edək ki, maliyyə dəyəri olmayan bu mükafata "SpaceX" və "Tesla" şirkətlərinin baş direktoru Elon Musk, eləcə də "Facebook"un qurucusu Mark Zuckerberg də layiq görülüblər.
