ABŞ Milli Sağlamlıq İnstitutunun (NIH) dəstəklədiyi tədqiqat çərçivəsində iflicli xəstələrin həm danışıq, həm də bədən hərəkətlərini eyni vaxtda rəqəmsal şəkildə ifadə etməsinə imkan verən beyin-kompüter interfeysi hazırlanıb.

Aztibb.az "TRT Haber"ə istiandən yazır ki, Kaliforniya Universitetində aparılan araşdırmada alimlər üç iflicli xəstənin beyin siqnallarını maşın öyrənməsinə əsaslanan sistem vasitəsilə rəqəmsal mühitdəki virtual avatara ötürə biliblər.

Xüsusi kabellər vasitəsilə xəstələrin beynindən alınan danışıq və hərəkətlərlə bağlı siqnallar eyni vaxtda emal edilərək virtual personaja ötürülüb. Sistem xüsusilə amiotrofik lateral skleroz (ALS) kimi ağır hərəkət məhdudiyyətləri yaradan xəstəlikləri olan insanların daha sürətli ünsiyyət qurmasına imkan verə bilər.

Danışıq və hərəkətlər eyni vaxtda ötürülür

Əvvəlki beyin-kompüter interfeyslərində danışıq və ya bədən hərəkətlərinin ayrıca ötürülməsi mümkün olsa da, tədqiqatçılar yeni sistemin hər iki funksiyanı eyni vaxtda həyata keçirən ilk sistem olduğunu bildirirlər.

Alimlər hazırda texnologiyanın simsiz versiyası üzərində də işləyirlər. NIH rəhbəri Debara Tucci yeni nəticələrin gələcəkdə ağır iflicli insanların ünsiyyət imkanlarının daha dolğun şəkildə bərpa olunmasına ümid verdiyini qeyd edib.