Yaxın illərdə beyinlə əlaqəli xəstəliklər dünyada ən geniş yayılan sağlamlıq problemləri sırasında ilk yerə çıxacaq.

Aztibb.az "İzvestiya" nəşrinə istinadən yazır ki, bu fikri Rusiya Elmlər Akademiyasının (REA) vitse-prezidenti, Rusiya Nevrologiya və Neyroelmlər Mərkəzinin direktoru, akademik Mixail Piradov səsləndirib.

O, "Rusiya və dünya: sağlam uzunömürlülük trendləri" forumunda çıxışı zamanı bildirib ki, hazırda neyroelmlər sahəsi elmi tədqiqatların əsas istiqamətlərindən birinə çevrilib.

Akademikin sözlərinə görə, artıq bu gün dünyada elmi jurnallarda dərc olunan hər on məqalədən biri beyin və sinir sistemi üzrə araşdırmalara həsr olunur. Bu da alimlərin beyin xəstəliklərinin qarşısının alınması və müalicəsinə artan diqqətini göstərir.

Mixail Piradov vurğulayıb ki, beyin zədələnməsi ilə bağlı halların 45 faizə qədəri erkən mərhələdə aşkar edilərək vaxtında müalicə olunduqda geri dönən xarakter daşıya bilər. Bu baxımdan erkən diaqnostika və profilaktik tədbirlər xüsusi əhəmiyyət kəsb edir.

Beyin insanın ömür uzunluğunu müəyyən edən əsas orqanlardan biridir. Beynin fəaliyyəti yalnız sinir sisteminə deyil, bütün orqanizmin funksiyalarına təsir göstərir. Sağlam həyat tərzi uzunömürlülüyü müəyyən edən ən vacib amillərdən biri olaraq qalır.

Bundan əvvəl alimlər bildiriblər ki, müntəzəm şəkildə həyata keçirilən qısa zehni məşqlər insanın idrak funksiyalarını və düşünmə qabiliyyətini istənilən yaşda, hətta 90 yaşdan yuxarı şəxslərdə belə yaxşılaşdıra bilər.