Salyan Rayon Mərkəzi Xəstəxanasında yüksək mürəkkəblik dərəcəsinə malik plastik-rekonstruktiv cərrahi əməliyyat uğurla həyata keçirilib.

 

Xəstəxanadan Aztibb.az-a bildirilib ki, pasiyent anadangəlmə serebral iflicin tetraflegik formasından əziyyət çəkən, nitq və əqli inkişaf pozğunluğu olan 1987-ci il təvəllüdlü qadındır. Ondakı genital və sidik yollarının anomaliyası uzun illər idi ki, həyat keyfiyyətini ciddi şəkildə məhdudlaşdırırdı. Aparılmış ətraflı müayinə və multidisiplinar qiymətləndirmədən sonra cərrahi müdaxiləyə qərar verilib.

Əməliyyatı xəstəxananın “Tərəqqi” medallı ümumi cərrahı Yeganə Əliyeva və həkim-anestezioloq Hilal Məlikov icra ediblər.

 

Cərrahiyyə prosesinin əsas çətinliklərindən biri pasiyentin yanaşı xəstəlikləri və ümumi vəziyyəti səbəbindən anesteziyanın yüksək risk daşıması idi. Buna baxmayaraq, anestezioloji komandanın peşəkarlığı, işin dəqiq planlaşdırılması və əməliyyat müddətində aparılan diqqətli monitorinq sayəsində proses tam təhlükəsiz başa çatıb.

 

Əməliyyatdan sonrakı dövrdə xəstənin fizioloji funksiyaları tam bərpa olunub, həmçinin uzun müddətdir məhdudlaşan oturma funksiyası yenidən qazanılıb. Bu uğurlu nəticə yalnız anatomik qüsurun aradan qaldırılması deyil, həm də pasiyentin gündəlik rahatlığının və sosial adaptasiya imkanlarının əhəmiyyətli dərəcədə yaxşılaşması deməkdir.

 

Belə mürəkkəb klinik halların uğurlu həlli rayonda müasir tibbi yanaşmanın və komanda işinin yüksək səviyyədə olmasının göstəricisidir.