Anal sfinkter çatışmazlığı və nəcisqaçırma fərdlərin həyat keyfiyyətinə ciddi dərəcədə mənfi təsir göstərən, lakin cəmiyyətdə çox zaman utanc hissi səbəbindən gizlədilən patologiyalardan biridir.

Aztibb.az xəbər verir ki, cərrah-proktoloq, endoskopist Anar Əliyevin sözlərinə görə, bu narahatlıq zamanı bağırsaq hərəkətlərini idarəetmə funksiyası zəifləyir və nəticədə pasiyentlər qaz və ya nəcisi saxlamaqda ciddi çətinliklərlə qarşılaşırlar.

Tibbi tədqiqatlar göstərir ki, xəstəliyin yaranmasında əsasən ağır doğuş travmaları, keçirilmiş cərrahi əməliyyat sonrası zədələnmələr, yaşla bağlı əzələ tonusunun zəifləməsi, nevroloji pozuntular və xroniki iltihabi bağırsaq xəstəlikləri mühüm rol oynayır.

Pasiyentlərin patoloji proses zamanı qarşılaşdıqları nəcis saxlaya bilməmək, nəzarətsiz qazqaçırma, daimi narahatlıq, gigiyenik problemlər və bunlara bağlı olaraq sosial həyatdan tamamilə uzaqlaşma kimi əlamətlərə qarşı son dərəcədə diqqətli olmaq tələb olunur.

Bir çox insan bu mövzuda danışmaqdan çəkinərək problemi illərlə gizlədir və ixtisaslaşmış həkimə müraciəti gecikdirərək vəziyyəti daha da ağırlaşdırır. Halbuki müasir proktologiyanın verdiyi imkanlar sayəsində xəstəliyin dəqiq diaqnostikası, eləcə də fərdi yanaşma ilə effektiv mühafizəkar və ya cərrahi müalicəsi tamamilə mümkündür.