Virus infeksiyaları bəşəriyyət üçün böyük təhlükə yaradır. Geniş antiviral təsir göstərən dərman bitkiləri bu kimi infeksiyaların qarşısını almaqda effektiv təsirə malikdir.

Aztibb.az-a müsahibəsində AMEA Botanika İnstitutunun Etnobotanika laboratoriyasının müdiri, biologiya elmləri doktoru, professor Səyyarə İbadullayeva bildirib ki, qrip virusunun təbii inhibitorları çox qədimdən araşdırılır. Ötən əsrdə aparılan tədqiqatlar qrip virusunu inhibə edə biləcək fitokimyəvi maddələrin müəyyənləşdirilməsinə yönəldilib.

Mütəxəssis qeyd edib ki, son tədqiqatlara görə, alkaloidlər, flavonoidlər, qlükozidlər, polifenollar, saponinlər kimi müxtəlif fitokimyəvi maddələrlə zəngin olan birtkilərin qrip əleyhinə təsiri daha güclüdür.

Müsahib belə vasitələrdən biri olan bioaktiv qida əlavəsi və komponent kimi istehsal olunan, biyan ekstraktları əsasında hazırlanan “Glycyrrhizin” (Qlisirizin turşusu) barədə məlumat verib. Qeyd edib ki, onun koronaviruslara qarşı aktivliyi sübut olunub.

Alimin sözlərinə görə, hazırda Ağdaş rayonunda biyan məhsulları istehsal edən zavod fəaliyyət göstərir. Bu müəssisə “Glycyrrhizin” istehsalı üçün hər bir avadanlığa sahibdir. 

Laboratoriya müdiri əlavə edib ki, dünyada antiviral bitki kimi becərilən qırmızı hörümçək zanbağı növü də ölkəmizdə böyük plantasiyalarda becərilə bilər. Onun geniş spektrli antiviral effektlərə sahib olduğu barədə dünya praktikasında bir çox tədqiqatlara rast gəlinir.