Fransa və Kanadadan olan tədqiqatçılar ilk dəfə göstəriblər ki, mitoxondrilərin funksional pozğunluğu neyrodegenerativ xəstəliklər zamanı koqnitiv problemlərə birbaşa səbəb ola bilər. Alimlər hüceyrələrin “enerji stansiyaları” hesab edilən mitoxondriləri müvəqqəti aktivləşdirməyə imkan verən alət yaradaraq demensiya əlamətləri olan siçanların yaddaşını bərpa ediblər. 

Aztibb.az xəbər verir ki, “Science Daily” nəşrinin məlumatına görə, alimlər mitoxondrilərdəki pozuntularla demensiya arasında əlaqəni sübut ediblər.

Fransa Milli Səhiyyə və Tibbi Tədqiqatlar İnstitutunun, Bordo Universitetinin və Monkton Universitetinin alimləri neyronlardakı mitoxondrilərin fəaliyyətini stimullaşdıran süni mitoDreadd-Gs reseptoru hazırlayıblar. Bu reseptor aktivləşdirildikdə demensiya simptomları olan siçanlarda yaddaş göstəricilərinin yaxşılaşdığı müşahidə olunub.

Tədqiqatın həmmüəllifi Covanni Marsikanonun sözlərinə görə, “bu araşdırma ilk dəfə olaraq mitoxondrial disfunksiya ilə neyrodegenerasiya simptomları arasında səbəb-nəticə əlaqəsini ortaya qoyub”.

Əvvəllər alimlər Alzheimer xəstəliyi zamanı mitoxondrilərdə problemlərlə neyronların məhvi arasında paralellik olduğunu bilsələr də, hansı prosesin əvvəl başladığı məlum deyildi. Yeni eksperiment göstərib ki, hüceyrələrin enerji təminatındakı pozuntu onların məhvinə qədər baş verə və yaddaşa birbaşa təsir göstərə bilər.