Nevrologiya mütəxəssisi professor Zeynep Aydın bildirib ki, botoks tətbiqində xəstənin müalicəyə reaksiyasına görə davamına qərar verilir. Bu müalicənin məqsədi miqren xəstələrinin ağrı hücumlarının tezliyini və şiddətini azaltmaqdır.
Aztibb.az “CNN Türk”ə istinadən xəbər verir ki, professorun sözlərinə görə, botoks müalicəsi xroniki miqren xəstələrini baş ağrısından qurtulmağa kömək edən bir üsuldur. Xroniki miqrenin ən az 3 ay müddətində ayda 15 gündən çox baş ağrılarının yaranmasına səbəb olduğunu və botoksun onun müalicə variantları arasında olduğunu izah edib.
Miqren müalicəsində botoksun necə istifadə edildiyini açıqlayan həkim, incə iynə ucları vasitəsilə baş və boyun nahiyələrində standart 31 nöqtəyə iynə vurulduğunu bildirib. O, tətbiqin öz təsirini 10 gündən sonra göstərdiyini və prosesin 20-25 dəqiqə çəkdiyini qeyd edib. Nevroloq botoks müalicəsinin məqsədinin miqren ataklarının tezliyini və şiddətini azaltmaq olduğunu vurğulayıb.
Miqren peyvəndi
Professor miqren müalicəsində istifadə edilən digər üsullardan biri də miqren peyvəndi olduğunu deyib. O bildirib ki, bu peyvənd beyində baş ağrısı hissinə səbəb olan maddələri bloklayaraq hücumların qarşısını alır. O izah edib ki, miqren peyvəndi iynə şəklində tətbiq edilir və bəzi hallarda təkbaşına, bəzən də dərmanlarla birlikdə istifadə edilə bilər.
Hər iki müalicə üsulunun miqren xəstələrinin həyat keyfiyyətini yaxşılaşdırmaq və ağrıkəsici asılılığını azaltmaq məqsədi daşıdığını ifadə edən həkim, bu müalicələrin təhsilli və təcrübəli həkimlər tərəfindən tətbiq edilməsi lazım olduğunu bildirib.
