Avropa ölkələrində bir müddətdir dərman çatışmazlığı problemi davam edir. Xüsusilə antibiotik, uşaqlar üçün öskürək siropu, qızdırma salan və təzyiq dərmanlarının tapılmasında problem olduğu bildirilir. 

Aztibb.az trthaber.com-ya istinadən xəbər verir ki, Avropa İttifaqının (Aİ) Əczaçılıq Qrupu (PGEU) 14 noyabr-31 dekabr tarixləri arasında Aİ ölkələri, həmçinin Türkiyə, Norveç, Kosovo və Şimali Makedoniya da daxil olmaqla 29 ölkədəki apteklərdə apardığı araşdırmanın nəticəsini açıqlayıb. 

Yüzlərlə adda dərmanın tədarükündə problemlərin olduğu bildirilib. Bunu Avropa ölkələrinin səhiyyə və tibb üzrə səlahiyyətli orqanlarının məlumatları da təsdiqləyib.  

Mütəxəssislər bu qış xəstəliklərin artmasına səbəb kimi immunitet sisteminin güclənə bilməməsini görürlər. Digər səbəblər kimi COVID-19 epidemiyasının uzun müddət davam etməsi, artan infeksiyalar qarşısında dərman istehsalçılarının yüksək tələbata hazır olmaması, Avropada yaşanan enerji böhranı və artan xammal qiymətlərinin istehsala təsiri görülür.