Xumar Novruzova: “Sətəlcəm vaxtında və düzgün müalicə olunmazsa ciddi fəsadlara yol aça bilər”
12.11.2022 19:08

2009-cu ildən başlayaraq Ümumdünya Səhiyyə Təşkilatı və UNESCO-nun təşəbbüsü ilə hər il 12 noyabr tarixi Ümumdünya Sətəlcəmə qarşı Mübarizə Günü kimi qeyd olunur. Bu günün qeyd edilməsinin məqsədi ağciyərin infeksion xəstəlikləri arasında müstəsna rol oynayan sətəlcəmın vaxtında aşkar edilməsinə, müalicə və profilaktikasına diqqəti cəlb etməkdir.

 

Mərkəzi Gömrük Hospitalının terapevti Xumar Novruzova sətəlcəmin simptomları, müayinə və müalicəsi, o cümlədən vaxtında müalicə edilmədikdə yaranan fəsadları barədə ətraflı məlumat verib.

 

Həkim bildirib ki, sətəlcəm ağciyər toxumasının infeksion mənşəli iltihabıdır. Bu xəstəliyin törədiciləri pnevmokokk, stafilo-streptokokklar virusları, mikoplazma və rikketsiyaları, göbələk və influenziya kimi bakteriyalardır. Risk qrupuna kiçik yaşlı uşaqlar, 65 yaşdan yuxarı, immunosupressiv dərmanlar qəbul edən xəstələr, yaşından asılı olmayaraq immun çatışmazlığı və ya xroniki xəstəlikləri olan insanlar daxildir.

 

Onun sözlərinə görə, sətəlcəmin risk faktoları da müxtəlifdir: bura alkoqol qəbulu, siqaret, qrip, xroniki bronxit, şəkərli diabet, LOR orqanlarının xroniki infeksiyaları, kondisioner və hava nəmləndiricilərindən istifadə və digər amillər aiddir. Hərarətin 38 C dən yuxarı olması, bəlğəmlı öskürək, zədələnmış nahiyədə ağrı, təngənəfəslik və intoksikasiya əlamətləri kimi halsızlıq, iştahsızlıq, tərləmə, başağrısı sətəlcəmin simptomlarıdır.

 

"Rentgen və labarator müayinələr diqnozu dəqiqləşdirməyə və dərhal müalicəyə başlamağa əsas verir. Müalicə törədicidən və xəstənin vəziyyətindən asılı olaraq 10-21 gün müddətində davam edir. Təkrar ağciyər rentgeni müalicədən 2-3 həftə sonra çəkilir", - deyə Xumar Novruzova bildirib.

 

Terapevt qeyd edib ki, sətəlcəmin profilaktikası mövsümi qrip və pnevmokokk vaksinlərini vurdurmaqla, xroniki infeksiya ocaqlarını vaxtında müalicə etməklə və zərərlı vərdişlərdən imtina etməklə effektiv olur. Sətəlcəm vaxtında və düzgün müalicə olunmazsa, həm ağciyərdə, həm ürək-qan damar, həm də mərkəzi sinir sistemində ciddi və həyat üçün təhlükəli hallara gətirib çıxara bilər. Odur ki, sağlamlığınızı həkimlərə etibar edərək, xəstəliyi vaxtında müalicə edin.