Aztibb.az xəbər verir ki, həkim-pediatr Günay Rəsulova bir çox valideynin dırnaqarası baxdığı "qidalanma məsələsi"nin uşaqların sağlamlığı üçün həyati vacib və önəmli, məsuliyyətli məsələ olduğunu bildirib. Qeyd edib ki, qaydalara riayət etməyən valideynlər birbaşa məsuliyyət daşıyırlar. Çünki uşaqların sağlamlığına onlar cavabdehdir.

 

Pediatrın sözlərinə görə, uşaq dünyaya gəldiyi gündən bütün ailənin sağlam qidalanmaya riayət etməsi son dərəcə vacibdir:

 

"Qısaca, şəkərli diabet xəstəliyinin qapınızı döyməsini istəmirsinizsə, uşaqları açıq havada çox gəzdirin, aktiv oyunlar oynadın, bol lifli qidalar, tərəvəzlər, meyvə (şirəsi yox, özü) və göyərtiləri yedizdirin, sevdikləri aktivlik, hobbiləri ilə məşğul olmağa şərait yaradın (telefon, tv xaric olmaqla) və mütləq şəkərli və zərərli qidalardan uzaq tutun. Elə bu gündən başlayın. Başlanğıc üçün heç vaxt gec deyil. Evdə zərərli qidalar varsa, onları elə bu dəqiqə tullayın, sağlam olmaq üçün daha da gec qalmayın", - deyə həkim həyəcan təbili çalıb.